कैलालीको गोदावरी नगरपालिका – ५ गेटामा निर्माण भैरहेका भवनहरु प्रस्तावित गेटा मेडिकल कलेजका हुन । उक्त मेडिकल कलेजलाई सुरुवाती चरणमा मेडिकल कलेज, स्वास्थ्य प्रतिष्ठान वा मेडिकल विश्वविद्यालय, के बनाउने भन्ने बारेमा निक्र्यौल नहुँदा सामान्य हिसाबले सबैले गेटा मेडिकल कलेज भनेर सम्बोधन गरे । अहिले पनि सोही नामले आम मानिसहरुले सम्बोधन गर्ने गर्दछन ।
हाल गेटामा करोडौंका भवनहरु ठडिएका छन, तर अझै पनि कुन प्रारुपमा त्यसलाई सञ्चालन गर्ने भन्ने एकिन नहुदाँ ति भवनहरु छाडा चौपाया बस्ने स्थलका रुपमा मात्रै प्रयोग भएका छन । गेटा मेडिकल कलेजलाई यथासक्य सञ्चालनमा ल्याईनुपर्ने भन्दै अत्तरियामा हस्ताक्षर अभियान पनि सञ्चालन गरिएको थियो ।
स्थानीय युवाहरुको समुहले गेटा मेडिकल कलेजलाई प्रतिष्ठानका रुपमा छिटो अगाडी बढाई सञ्चालनमा ल्याईनुपर्ने भन्दै आन्दोलन नै गरेका थिए । सोही विषयको समर्थन गर्दै र गेटा मेडिकल कलेजलाई प्रतिष्ठानको रुपमा अगाडी बढाउनुपर्ने लगायतका मागहरु राख्दै डाक्टर गोबिन्द केसी अनसन बसेका थिए । सरकारसँगको सहमतिपछि केसीले अनशन तोडेका थिए । त्यसअघि धनगढी उपमहानगरपालिकाको प्रशासनिक भवनको शिलान्यास गर्ने क्रममा प्रधानमन्त्री शेर बहादुर देउवाले पनि उक्त मेडिकल कलेजलाई प्रतिष्ठानका रुपमा अगाडी बढाईने बताएका थिए ।
आर्थिक वर्ष २०७३/०७४ बाट गेटामा कलेज निर्माण थालिएको थियो । संघीय शिक्षा मन्त्रालयले निर्माण थालेको कलेजको प्रशासनिक भवन, कलेज भवन, छात्राबास लगायत संरचना निर्माणको काम सकिएको छ । कलेजको करिब ९० प्रतिशत भन्दा बढी काम सकिईसकेको अवस्था छ ।
गेटा मेडिकल कलेज सञ्चालन नभएकाले अहिले त्यो विषय चुनावी मुद्धा बनेको छ । मंसिर ४ गते हुन गैरहेको प्रतिनिधि सभा र प्रदेश सभा निर्वाचनमा होमिएका हेबिवेट नेताहरुले नै अहिले गेटा मेडिकलको विषयलाई राजनीतिक मुद्धा बनाएर आफ्नो चुनावी एजेण्डामा समावेश गरेका छन । नेतृत्व तहमा पुगेका बेला छड्के आँखा समेत नलगाएका नेताहरुले अहिले घरदैलो अभियानका क्रममा पनि गेटा मेडिकल कलेजलाई निर्माण गर्ने सपनाहरु मतदाताहरुलाई देखाउन थालेका छन ।
आफुले जिते तुरुन्तै गेटा मेडिकल कलेज सञ्चालनमा ल्याउने भन्दै फुर्ति देखाईरहेकाहरुले यसअघिका बर्षहरुमा नेतृत्व तहमा पुग्दा भने बेवास्त गरेका थिए । जनतालाई झुक्याएर चुनावमा आफ्नो पक्षमा मत तान्नका लागी गरिने यस्ता क्रियाकलापहरुको अब भने विरोध गर्नुपर्ने अवस्था आएको छ ।
पटक पटक एउटै मुद्धाले चुनाव जित्ने सपना देखिरहेका नेताहरुलाई वास्तविक धरातलमा उभ्याउने समय आएको छ । यो समयमा नागरिकहरु चुक्न हुन्न । त्यसैले गेटा मेडिकल कलेजलाई जस्तै यहाँका अन्य पुराना योजनाहरुलाई पनि विगतका जसरी चुनावी मुद्धा मात्रै बनाएर भोट माग्न आउने नेताहरुलाई मतदाताले चिन्न आवश्यक छ ।
