अत्तरिया– कैलालीको अत्तरिया बजारमा रहेका मासु पसलहरुको अनुगमन गरिएको छ । शुक्रबार गोदावरी नगरपालिका पशु सेवा शाखाले बजारमा रहेका मासु पसलहरुको अनुगमन गरेको हो ।
मासुजन्य वस्तुहरुबाट नै मानिसमा बढी रोगहरु सर्ने भएकाले मासु पसलहरुको सरसफाई र अवस्था चेकजाँच गर्नका लागि अनुगमन गरिएको पशु सेवा शाखा प्रमुख राम सार्कीले बताए । उनका अनुसार शुक्रबार करिब १२ वटा पसलहरुको अनुगमन गरिएको थियो । अनुगमनमा मासु पसलहरुको सरसफाई, मासु काट्ने सामग्री र स्थानको अवस्था, मासु राख्ने तरिका तथा पसल दर्ता र नविकरण लगायतका विषयवस्तुहरु हेरिएको थियो । जुन आधारमा मासु पसलहरुमा प्रायजसो सरसफाई देखिएपनि मासु राख्ने अवस्था भने गुणस्तरिय नभएको पाईएको छ ।
पशु सेवा शाखा प्रमुख सार्कीले मासुलाई फ्रिज भित्र कसरी राख्ने, मासु काट्दा के गर्ने, मासु सँग केही अन्य सामान राख्ने कि नराख्ने भन्ने विषयमा व्यवसायीहरुलाई जानकारी दिईएको बताए । उनले पहिलो पटक भएकाले सबै मासु पसलेहरुलाई नगरपालिकाले भने बमोजिम गर्न निर्देशन दिईएको तर अर्काे पटक पनि सोही अवस्था देखिए कारबाही गरिने बताए । नगरउपप्रमुख शारदा देवी रोकायाको संयोजकत्वमा भएको अनुगमनमा वडा नं. १ का वडाध्यक्ष एवम् नगरप्रवत्ता गोपाल दत्त भट्ट, पशु सेवा शाखा प्रमुख राम सार्की लगायतको सहभागिता रहेको थियो । अनुगमनका क्रममा कतिपय पसलहरुले वडा कार्यालयमा व्यवसाय दर्ता नै नगरेको तथा कतिले एक वडामा दर्ता गरेर अर्काे वडामा व्यवसाय सञ्चालन गरेको पाईएको थियो ।
नगरपालिकाले थालेको मासु पसलको अनुगमनलाई व्यवसायीहरुले सकारात्मक रुपमा लिएको बताएका छन । धनगढीरोडस्थित थापा मासु पसलका सञ्चालन दिलिप थापाले अनुगमन हुनु आफूहरुका लागि राम्रो भएको बताए । उनले आफूहरुका कमी कमजोरीहरु सुधार्ने अवसरका रुपमा आफूले अनुगमनलाई लिएको बताए । तर उनले मासु व्यवसायहरुलाई व्यवस्थीत गर्न आवश्यक रहेको कुरा औल्याएका थिए । नगरपालिकाले शनिबार पनि बजारका अन्य स्थानमा अनुगमन गर्ने जनाएको छ ।
