अत्तरिया – कैलालीको अत्तरियामा सृजनशील गोदावरी महोत्सव आयोजना गर्दा निर्माण गरिएको खुला मैदान लथालिङ्ग अवस्थामा पुगेको छ । न्यु सृजनशील युवा क्लबले गत वर्ष पुस ९ देखि पुस २१ गतेसम्म आयोजना गरेको महोत्सवका लागि तयार पारेको मैदान संरक्षण नहुँदा लथालिङ्ग अवस्थामा पुगेको हो । अत्तरियाको खुला मञ्चका रूपमा लिइएको उक्त मैदानमा हाल बजारको ढल निकासको नाला निर्माण गरिनुका साथै मगन्तेहरूको अड्डा पनि बनेको छ । चारैतिर खुला रहेको उक्त मैदानमा छाडा चौपायाले पनि आफ्नो वासस्थान बनाएका छन् ।
हाल अत्तरिया चोकको पानी निकासका लागि निर्माणाधीन नाला पनि मैदानको छेउ सम्म मात्रै निर्माण गरिँदै छ । बाँकी मैदानमा अस्थायी कच्ची नाला खनिएको छ । सडक डिभिजन कार्यालय महेन्द्रनगरले निर्माण गरिरहेको उक्त नाला सडकको क्षेत्रमा अतिक्रमण गरेर बनाएका संरचना बचाएर वन मैदान क्षेत्रमा निर्माण गरिएको छ ।
नाला हेर्ने साइड इन्जिनियर प्रकाश खड्काले भने तत्काल अतिक्रमण हटाएर पानी निकास गर्न सक्ने अवस्था नभएकाले वनको क्षेत्रमा पर्ने मैदानमा नाला निर्माण गरिएको बताए । उनले अतिक्रमण गरिएको क्षेत्र पक्की नाला निर्माण गर्ने क्रममा हटाइने बताए । मैदानलाई हाल भारतबाट आएका मगन्तेहरूले पनि आफ्नो वासस्थान बनाएका छन् । उनीहरूले आफ्ना टेन्ट राखेर उक्त मैदानमा बस्दै आएका छन् । सडक किनाराको जङ्गल छेउमा बस्दै आएका उनीहरूको खुला मैदानमा बस्दै आएका छन् । केही भने मैदानको बिचमा अतिक्रमण गरेर अलपत्र अवस्थामा छोडिएको भवनमा समेत बस्दै आएका छन् ।
खुला मैदानमा छाडा चौपायाले पनि आफ्नो अड्डा जमाएका छन् । छाडा चौपायाले मैदानमा उम्रिएको घाँस खाने गरेका छन् । जसले गर्दा मैदानमा झन् कुरूप बनेको छ । अत्तरियामा खुला स्थान नहुँदा सृजनशील युवा क्लबले सुरक्षा सामुदायिक वन क्षेत्रमा पर्ने खाली क्षेत्रलाई सम्याएर मैदान निर्माण गरेको थियो । निकै आकर्षक मैदान निर्माण भए पनि यसलाई भविष्यको अत्तरियाको खुला मञ्चका रूपमा लिइएको थियो । तर, महोत्सव सकिएपछि सम्बन्धित पक्षले मैदानको संरक्षणमा चासो नदिँदा अहिले मैदानको बेजोग भएको छ ।
न्यु सृजनशील युवा क्लबका सदस्य विक्रम विष्टले खुला मैदानलाई थप व्यवस्थित बनाउने प्रयास प्रयास गरे पनि डिभिजन वन कार्यालयले अवरोध गरेको बताए । उनले महोत्सव लगतै खुला मैदानमा खेलकुदका कार्यक्रम गर्ने योजना बनाएको बताउँदै त्यसका लागि थप मैदान सम्याउन खोज्दा वनले रोकेको बताए । उनले वनले रोकेपछि हाल खुला मैदान अलपत्र अवस्थामा रहेको बताए ।
खुला मैदान निमार्ण भएपछि महोत्सव अवधिमै पनि यसलाई नगरपालिकाले संरक्षण गरेर अत्तरियाको खुला मञ्चको रूपमा विकास गर्नुपर्ने आवाज उठेको थियो । अत्तरिया सामान्य कार्यक्रम गर्ने स्थानको पनि अभाव हुँदा सडकमै कार्यक्रम गर्नुपर्ने बाध्यता रहेकाले उक्त मैदानलाई प्रयोग गर्न सकिने परिकल्पना गरिए पनि हाल संरक्षण गरिनुको सट्टा झन् कुरूप बनाउने काम भइरहेको छ । जसले गर्दा अघिल्लो महोत्सव सम्म पनि खुला मैदान संरक्षित रहने हो वा होइन भन्ने प्रश्न उठेको छ ।
