धनगढी – कैलालीको बर्दगोरिया गाउँपालिका–३ रानीकुण्डाका २१ मुक्त कमैया घर परिवारलाई आइतबार सुरक्षित आवास हस्तान्तरण गरिएको छ । विपिन्न परिवारका लागि सुरक्षित आवास निर्माण कार्यक्रम अन्तर्गत सुदूरपश्चिम प्रदेश सरकार, बर्दगोरिया गाउँपालिका, ह्याबिटाट फर ह्युमानिटी नेपाल र राष्ट्रिय दलित नेटवर्कको संयुक्त सहयोगमा आवास निर्माण गरेर हस्तान्तरण गरिएको हो ।
भूमि, व्यवस्था, कृषि तथा सहकारीमन्त्री वीरबहादुर थापाले आवास उद्घाटन र हस्तान्तरण गरे । सो क्रममा उनले नेपालमै पहिलो पटक सुदूरपश्चिम प्रदेश सरकारले कार्यविधि बनाएर मुक्त कमैया, मुक्त हलिया र कमलरीका लागि सुरक्षित आवास निर्माणको कार्य अगाडि बढाएको बताए । तीन तहकै सरकारबीच समन्वय भएर सही तथ्यतथ्याङ्क आएमा यी वर्गको लागि आवश्यक सुरक्षित आवास एकै वर्षमा बनाउन सकिने उनको भनाइ छ । कार्यक्रममा पूर्वमन्त्री एवम् प्रदेश सभा सदस्य रामेश्वर चौधरीले पुनस्र्थापना सहजताका लागि स्थानीय तहहरुलाई पनि मुक्त कमैया, कमलरी तथा मुक्त हलिया पुनस्र्थापना कार्यविधि चाँडै बनाउन आग्रह गरे ।
बर्दगोरिया गाउँपालिकाका अध्यक्ष कर्णबहादुर कुँवरले गाउँपालिकाभित्र रहेका सबै मुक्त कमैयाको पुनस्र्थापना गर्न तयार रहेको बताए । ह्याबिटाट फर ह्युमानिटी नेपालका पश्चिम प्रमुख पुनिता चौधरीले आफ्नो संस्थाले अहिलेसम्म मुक्त कमैया, मुक्त हलियासहित विपन्न वर्ग भूमिहीनका लागि २५२ वटा सुरक्षित आवास निर्माण गरेर हस्तान्तरण गरिसकेको उल्लेख गरे ।
उनले यी वर्गहरुको घर मर्मतका लागि पनि अगाडि बढ्ने तयारी भइरहेको बताए । राष्ट्रिय दलित नेटवर्कका केन्द्रीय अध्यक्ष मोहन ओडले प्रदेश सरकार, स्थानीय तह र सङ्घसंस्थाहरूको सहकार्यमा सुरक्षित आवास निर्माण गरिएको जानकारी दिए । कुल एक करोड ४७ लाख ६९ हजार रुपियाँ लगानीमा चर्पी, भान्सासहित दुई कोठे आवास २१ वटा निर्माण गरिएको जनाइएको छ ।
