धनगढी – धनगढीको फाप्ला खेल मैदानमा जारी चौथो संस्करणको अन्तरपालिका स्तरीय एसपिए कैलाली प्राइड लिगको सेमिफाइनल समिकरण पुरा भएको छ । मंगलबार सम्पन्न निर्णायक खेलमा आलिताल गाउँपालिकालाई ७ विकेटले पराजित गर्दै धनगढी उपमहानगरपालिका अन्तिम चारमा प्रवेश गर्ने चौथो टोली बनेको हो । यसअघि नै बाजुराको बुढीगंगा नगरपालिका, कैलालीको घोडाघोडी नगरपालिका र कञ्चनपुरको पुनर्वास नगरपालिका ‘बी’ ले सेमिफाइनलमा आफ्नो स्थान सुरक्षित गरिसकेका छन् ।
मंगलबार भएको खेलमा टस जितेर पहिले ब्याटिङ गरेको आलिताल गाउँपालिकाले १९.४ ओभरमा सबै विकेट गुमाउँदै मात्र ८२ रन बनाउन सक्यो। आलितालका लागि समीर बिस्टले सर्वाधिक २४, कप्तान दिल बोहराले १४ र राजु रिजालले १२ रन जोडे। आलितालको इनिङ्सलाई ध्वस्त पार्ने क्रममा धनगढीका सन्नी बीकले घातक बलिङ गर्दै ४ ओभरमा मात्र ७ रन खर्चेर ३ विकेट लिए । त्यस्तै प्रकाश जंग कार्की र विशाल क्षेत्रीले समान २–२ विकेट झारे ।
८३ रनको सामान्य लक्ष्य पछ्याएको धनगढी उपमहानगरपालिकाले १२ ओभरमा मात्र ३ विकेट गुमाएर लक्ष्य पूरा गयो । धनगढीको जितमा रोहन बीकेले २२ रन बनाए भने सन्नी बीकले ब्याटिङमा पनि चम्किँदै ८ बलमा २ छक्कासहित अविजित १९ रनको विष्फोटक पारी खेले । शंकर बोहरा १३ रनमा अविजित रहे । आलितालका निराजन ऐर, दिल बोहरा र समीर बिस्टले १–१ विकेट लिए पनि टोलीको हार टार्न सकेनन् ।
सोमबार सम्पन्न खेलहरूमा टीकापुर नगरपालिकालाई पराजित गर्दै पुनर्वास ’बी’ सेमिफाइनलमा पुगेको थियो । पुनर्वासले दिएको १६७ रनको लक्ष्य पछ्याएको टीकापुर ५४ रनमै समेटिएको थियो । सोमबार नै भएको अर्को खेलमा आलितालले बरदगोरियालाई हराएर सेमिफाइनलको आशा जीवित राखे पनि मंगलबार धनगढीसँग पराजित भएसँगै आलिताल प्रतियोगिताबाट बाहिरिएको छ ।
त्यसअघि नै घोडाघोडी र बुढीगंगा पनि सेमिफाइनल पुगेका थिए । जिल्ला क्रिकेट संघ कैलालीको आयोजनामा जारी यस प्रतियोगिताको विजेताले नगद ३ लाख र उपविजेताले १ लाख रुपैयाँ प्राप्त गर्नेछन् । प्रतियोगिता चैत ५ गतेसम्म सञ्चालन हुनेछ । प्रतियोगितामा १२ वटा टिमको सहभागिता रहेको थियो ।
