अत्तरिया – सहिद दशरथ चन्द राष्ट्रिय स्वास्थ्य विज्ञान विश्वविद्यालय संघर्ष समितिले धनगढी विमानस्थलको गेटमा होर्डिङ बोर्ड टाँसेको छ । संघर्ष समितिले विभिन्न ५ बुँदे माग राख्दै एयरपोर्टको गेटको दुवैपट्टि होर्डिङ बोर्ड टाँसेको हो ।
होर्डिङ बोर्डमा सहिद दशरथ चन्द राष्ट्रिय स्वास्थ्य विज्ञान विश्व विद्यालय विधेयक चालु संसद् अधिवेशनबाट पारित गर, ६ सय शय्याको अस्पतालका लागि बनेका संरचनामा तत्काल ३ सय शय्याको अस्पताल सञ्चालन गर, सुदूरपश्चिम प्रदेशमै मेडिकल पढाई कहिले पढ्न पाउने माग लेखिएका छन् ।
यस्तै तत्काल गेटामा मेडिकल पढाई हुने व्यवस्था गर, देशका ६ वटा प्रदेशमा २५ वटा भन्दा बढी मेडिकल कलेज, प्रतिष्ठान हुँदा सुपमा एउटा पनि नहुनुको दोष कसलाई दिने भनेर प्रश्न पनि गरिएको छ ।
संघर्ष समितिका संयोजक लोक राज पाण्डे (आगो) ले सुदूरपश्चिममा सहिद दशरथ चन्द राष्ट्रिय स्वास्थ्य विज्ञान विश्वविद्यालय स्थापनाका लागि भइरहेको आन्दोलनका कार्यक्रम अन्तरत एयरपोर्टको गेटमा बोर्ड लगाइएको बताए । उनले सुदूरपश्चिमबाट प्रधानमन्त्री, मन्त्री भएकाहरुबाटै बेवास्ता गरिएको बताए ।
‘के सुदूरपश्चिमबाट कोही प्रधानमन्त्री भएको छैन ? के सुदूरपश्चिमबाट कोही मन्त्री भएको छैन ? यहाँबाट सांसद छैनन भनेर प्रश्न गर्नको लागि हामीले बोर्ड टासेका हौ’ उनले भने ‘हाम्रो एउटै भनाइ हो गेटामा तत्काल ३ सय शय्याको अस्पताल सञ्चालन गरिनुपर्छ भन्ने हो । मेडिकल शिक्षा पढाई हुनुपर्छ । विश्वविद्यालयको विधेयक पारित हुनुर्पर्छ भन्ने हो ।’
