बझाङ- बझाङमा उत्कृट कृषकलाई सम्मान गरिएको छ । प्रधानमन्त्री कृषि आधुनिकीकरण परियोजना कार्यान्वयन एकाइ बझाङले उत्कृट कृषकलाई सम्मान गरेको हो ।
आर्थिक वर्ष २०८०/८१ को स्वीकृत वार्षिक कार्यक्रम अन्तर्गत सुर्मा गाउँपालिका-१ का कृषक रँगी बोहरा, बित्थडचिर गाउँपालिका-१ का कलक बोहरा र जयपृथ्वी नगरपालिका-११ का सिगेँ धामीलाई सम्मान गरिएको छ । उनीहरुलाई जनही १२ हजार रुपैयाँ र सम्मान पत्रसहित सम्मान गरिएको छ ।
आलु जोन क्षेत्रमा पुर्याएको योगदानको उच्च कदर गर्दै उत्कृष्ट तीन जना किसान छनोट गरी सम्मान गरिएको प्रधानमन्त्री कृषि आधुनिकीकरण परियोजना कार्यान्वयन एकाइ बझाङका कार्यालय प्रमुख चरित्र नारायण यादवले बताए । उनले परियोजना लागु भइसकेपछि बाहिरबाट आउने आलु बन्द भएको बताए । अघिल्लो वर्ष जिल्लाबाट आलु बाहिर जिल्ला पनि पठाइएकोमा यो वर्ष खडेरीका कारण राम्रो उत्पादन लिन नसकेको बताए ।
जिल्लामा दुई ओटा जोन सञ्चालनमा छन् । जसमा आलु जोन जिल्लाका ४५ वडामा र दलहनबाली सिमी जोन जिल्लाको १८ वटा वडामा लागु छ । जस अन्तर्गत ६ सय ४० हेक्टर क्षेत्रफलमा आलु लगाइएको छ भने १ सय ८० हेक्टरमा सिमी लगाइएको कृषि प्राविधिक कुम्भराज रोकायाले बताए ।
