काठमाण्डौं – रुस–युक्रेन युद्धका बारेमा स्पष्ट अडान लिन भारतमाथि दबाब बढ्दै गएको छ । दुई देशबीचको सङ्कट समाधानका लागि वार्ता र कुटनीतिमा जोड दिँदै भारत संयुक्त राष्ट्रको महासभामा भएको मतदानमा तटस्थ बसेको थियो । आफ्नो आधिकारिक धारणामा पनि भारतले क्षेत्रीय अखण्डताको महत्त्वको बारे चर्चा गरेको छ तर रुस वा युक्रेनको बारेमा ठोस अडान लिएको छैन ।
भारतका लागि रुसी राजदूत डेनिस अलीपोभले भारतको स्वतन्त्र विदेश नीति स्वागतयोग्य रहेको बताएका छन भने अमेरिकाका वरिष्ठ कुटनीतिज्ञ डोनाल्ड लूले वाशिङ्टनले युक्रेनबारे भारतको स्पष्ट अडान बुझ्ने प्रयास गरिरहेको बताएका छन ।
मस्कोबाट भारतले झन्डै ५० प्रतिशत रक्षा सामग्री आयात गर्छ । साथै रुस र भारत विश्वव्यापी मामिलामा भरपर्दो साझेदार हुन् । त्यसैगरी अमेरिकासँग पनि भारतको सम्बन्ध पछिल्ला दुई दशकदेखि बढ्दो क्रममा छ ।
