काठमाडौँ – माधवकुमार नेपाल नेतृत्वको पार्टीको नाममा एमाले र महन्थ ठाकुर नेतृत्वको पार्टीको नाममा जसपा घुसाउन नपाइने भएको छ ।
निर्वाचन आयोगले एमाले र जसपा नाम जोडेर नयाँ पार्टी दर्ता गर्न नमिल्ने जानकारी दुवै पक्षलाई गराइसकेको छ ।
आयोगले सर्वाेच्च अदालतको फागुन २३ को फैसला अनुसार कुनै दलको नामसँग जुधाएर नयाँ दलको नाम दर्ता गर्न नसकिने मौखिक जानकारी दुवै समूहलाई दिएर लिखित पत्र समेत पठाउने तयारी गरेको छ ।
माधव पक्षले नेकपा एमाले समाजवादी र महन्थ पक्षले जनता समाजवादी पार्टी लोकतान्त्रिक नाम प्रस्ताव गरेर नयाँ दल दर्ताका लागि आयोगमा निवेदन दिएका छन् ।
तर आयोगले यी दुवै नाममा दल दर्ता गर्न अनिच्छा देखाएपछि माधव र महन्थ समूहले नयाँ नाम राख्ने गृहकार्य अघि बढाएका छन् ।
