बिकाश सिंह महता/कञ्चनपुर – वेदकोटमा युवा संजालले दुर्घटना न्यूनीकरण गर्नका लागि वेदकोट नगरक्षेत्रमा छोडिएका छाडा पशुचौपायाको घाटीमा रिफ्लेक्टर (रातिमा चम्कीने डोरी) लगाएका छन ।
शनिबार जिल्ला ट्राफिक कार्यालय महेन्द्रनगर र सुडा प्रहरी चौकीको सहकार्य एवं बेदकोट नगरपालिकाको आर्थिक सहयोगमा संञ्जालले नगरपालिका क्षेत्रमा पर्ने पुर्वपश्चिम राजमार्गको सडकखण्ड अन्तरगत रहेका छाडा पशुचौपायाहरुको घाटीमा रिफ्लेक्टर लगाएका हुन ।
युवा सञ्जालका अध्यक्ष पदम राज पाण्डेयका अनुसार २ सय छाडाचौपायाका घाटीमा रिफ्लेक्टर लगाईएको छ । छाडा पशुचौपायाका कारण हुने सडक दुर्घट्ना न्यूनिकरणका लागि युवाहरु आफै जागरुग भएर लागेको अध्यक्ष पाण्डेयले बताए ।
कार्यक्रममा बेदकोट नगरपालिका मेयर अशोक कुमार चन्द, जिल्ला ट्राफिक कार्यालय महेन्द्रनगरका प्रहरी निरीक्षक केशव दत्त भट्ट, नगरपालिकाका पदधीकारी र युवा सञ्जालका युवाहरुको सहभागिता रहेको थियो ।
