अत्तरिया – नेपाल पत्रकार महासंघ कैलाली शाखाले ७१ औँ स्थापना दिवस मनाएको छ । सोमबार धनगढीमा आयोजित एक कार्यक्रमका बिच स्थापना दिवस मनाइएको हो ।
‘मर्यादित पत्रकारिता, सुरक्षित पत्रकार, श्रम अधिकार र प्रेस स्वतन्त्रता हाम्रो सरोकार’ भन्ने नाराका साथ मनाइएको उक्त कार्यक्रमबाट ५ बुँदे घोषणापत्र पनि जारी गरिएको छ ।
घोषणा पत्रको पहिलो बुँदामा नेपाल पत्रकार महासंघ कैलाली शाखाको स्थापनादेखि अहिलेसम्म योगदान दिएका हाल दिवङ्गत भएका संस्थापक सभापति अम्बिकाप्रसाद उपाध्याय, लिलानाथ ओझासहित सबै दिवङ्गत पत्रकारहरूप्रति श्रद्धाञ्जली अर्पण गरिएको छ । यस्तै दुई नम्बर बुँदामा नेपाल पत्रकार महासंघ कैलाली शाखा नागरिकको सूचनाको हक, प्रेस तथा अभिव्यक्ति स्वतन्त्रता, पत्रकारको हकहित र सुरक्षाप्रति पूर्ण प्रतिबद्ध रहेको घोषणा गरिएको छ ।
तेस्रो बुँदामा पत्रकार महासंघ कैलाली शाखा पत्रकारहरूलाई पत्रकारका सिद्धान्त, नैतिकता र आचारसंहिताको पूर्ण पालना गर्दै जिम्मेवार र उत्तरदायी पत्रकारिताका लागि सबै पत्रकार र सञ्चार गृहसँग अनुरोध गरिएको छ भने चौथो बुँदामा वर्तमान बदलिएको राजनीतिक अवस्थामा सरकारले सुशासन, पारदर्शिता र जबाफदेहीताका लागि चालेका सबै सकारात्मक कदमको समर्थन गर्दै स्वतन्त्र प्रेस, नागरिक अधिकार तथा वाक तथा अभिव्यक्ति स्वतन्त्रता सुनिश्चित गर्ने हरेक संरचना र अभ्यास तथा नीतिप्रति सरकार पूर्ण प्रतिबद्ध रहने विश्वास व्यक्त गरिएको छ ।
यस्तै पाँचौँ बुँदामा नेपाल पत्रकार महासंघ कैलाली शाखा स्थापना दिवसका अवसरमा आयोजित कार्यक्रममा सहभागी सबै पत्रकारलाई धन्यवाद ज्ञापन गरिएको छ ।
नेपाल पत्रकार महासंघ कैलाली शाखाका अध्यक्ष श्रवण देउवाको सभाध्यक्षतामा सम्पन्न कार्यक्रममा प्रमुख अतिथि नेपाल पत्रकार महासंघका केन्द्रीय अध्यक्ष योगेन्द्र बलायर प्रमुख अतिथि रहेका थिए । धनगढी ७ मनेहरामा रहेको चन्द्रमुखी ताल क्षेत्रमा आयोजना गरिएको कार्यक्रमको सञ्चालन कैलाली शाखाका सचिव तेज राज भट्टले गरेका थिए । कार्यक्रममा पत्रकारहरूका हक अधिकार, पछिल्लो समयका चुनौती लगायतका विषयमा छलफल गरिएको थियो ।
