अछाम – अछामको जयगढ गाउँपालिकाको केन्द्र जयगढ बजारमा मंगलबार बेलुका लागेको आगलागीमा करोडौँको क्षति भएको छ । बेलुकी ७ बजे पुष्पराज शर्माको आइएमी सेन्टरबाट सल्किएको आगो ३ घण्टासम्म नियन्त्रणमा नआउँदा २ दर्जन बढी घर पसल जलेर खरानी भएका हुन ।
जिल्ला प्रहरी कार्यालय अछामका प्रहरी प्रमुख डीएसपी इश्वरीप्रसाद भण्डारीले प्रारम्भिक विवरण सङ्कलन गर्दा २७ वटा पसल र अन्य घरमा आगलागीले क्षति पु-याएको बताए । प्रारम्भिक विवरणअनुसार सात करोड बढीको क्षति भएको उनले बताए ।
आगो बान्नीगढी जयगढ गाउँपालिका र मंगलसैन नगरपालिकाको दमकलको सहायताले सशस्त्र प्रहरी, प्रहरी र स्थानीय बासिन्दाको सहयोगमा आगो नियन्त्रणमा लिइएको थियो । आगो फैलिन नदिन डोजरले आगलागी भएको घरसंगै जोडिएको एउटा घर पनि भत्काइएको छ ।
