काठमाडौँ । गर्मी बढेसँगै पसिना र शरीरको दुर्गन्धबाट बच्नका लागि डियोडरन्ट र रोल–अन हाम्रो दैनिक जीवनको हिस्सा बनिसकेका छन् । बजारमा पाइने धेरै उत्पादनहरूले २४ देखि ४८ घण्टासम्म पसिना रोक्ने दाबी गर्छन् ।
धेरै मानिसहरूले सोचविचार नगरी अन्डरआम्र्समा यस्ता उत्पादन प्रयोग गर्ने गर्छन् । तर के यसरी जबरजस्ती पसिना रोक्नु सुरक्षित हुन्छ ? पसिना रोक्नु शरीरको प्राकृतिक कूलिङ सिस्टम र छालाको स्वास्थ्यसँग खेलवाड गर्नुजस्तै भएको डाक्टरहरू भन्छन् । आजको यस लेखमा हामी अन्डरआम्र्स ब्लक गर्दा हुने असरबारे कुराकानी गर्नेछौं ।
डियो र एन्टिपर्सपिरन्टबिचको फरक
सबैभन्दा पहिले डियोडरन्ट र एन्टिपर्सपिरन्टबीचको फरक बुझ्न आवश्यक छ । सामान्य डियोडरन्टले केवल पसिनाको दुर्गन्ध लुकाउने काम गर्छ । तर पसिना नै आउन नदिने रोल–अन वा स्प्रेहरूलाई एन्टिपर्सपिरन्ट भनिन्छ । यी उत्पादनहरूमा एल्युमिनियम कम्पाउन्ड र जिरकोनियमजस्ता तत्व प्रयोग गरिन्छ । अन्डरआम्र्समा लगाउँदा यी तत्त्वहरूले पसिना निकाल्ने ग्रन्थीको मुख बन्द गरिदिन्छन् । परिणामस्वरूप पसिना बाहिर निस्कन पाउँदैन र छाला सुख्खा देखिन्छ ।
अन्डरआम्र्स ब्लक गर्दा हुने ४ ठुला साइड इफेक्ट :
१. पसिना ग्रन्थि ब्लक हुने समस्या
पसिना बाहिर निस्कन नपाउँदा ग्रन्थिभित्रै जम्न थाल्छ । यसले अन्डरआम्र्समा दुख्ने गाँठा, पिप जमेका भएका फोका वा सिस्ट बन्न सक्छ ।
२. अन्डरआम्र्स कालो हुने समस्या
रोल–अन र डियोमा रहेका एल्युमिनियम, अल्कोहल र कृत्रिम सुगन्धले छालामा लगातार रासायनिक जलन पैदा गर्छन् । यसले छाला बिस्तारै कालो हुँदै जान सक्छ ।
३. एलर्जी र डर्मेटाइटिस
प्याराबेन्स र प्रोपिलिन ग्लाइकोलजस्ता प्रिजर्भेटिभहरूले संवेदनशील छालामा रातो दाग, चिलाउने र पोल्ने समस्या उत्पन्न गर्न सक्छन् ।
४. छालाको प्राकृतिक प्रक्रिया प्रभावित हुनु
पसिना शरीरको तापक्रम नियन्त्रण र केही विषाक्त पदार्थ बाहिर निकाल्ने प्राकृतिक प्रक्रिया हो । पोर्स पूर्ण रूपमा बन्द हुँदा छालाको स्वाभाविक सास फेर्ने क्षमता प्रभावित हुन सक्छ ।
कसरी सुरक्षित रहने ?
गर्मीमा सरसफाइ र स्वास्थ्यको ख्याल राख्नु दुवै आवश्यक छ । त्यसका लागि यी उपाय अपनाउन सकिन्छ :
- एल्युमिनियम–रहित र प्याराबेन–रहित डियो वा रोल–अनको प्रयोग गर्ने
- फिटकरी प्रयोग गर्ने । यो प्राकृतिक एन्टिब्याक्टेरियल एजेन्ट हो
- नुहाएपछि भिजेको अन्डरआम्र्समा हल्का फिटकरी दल्दा दुर्गन्ध कम हुन्छ
- टि–ट्री आयलको केही थोपा पानीमा मिसाएर प्रयोग गर्न सकिन्छ, जसले ब्याक्टेरिया नष्ट गर्न मद्दत गर्छ
