कञ्चनपुर – भदौ २३ को आन्दोलन र २४ गतेको प्रदर्शनका क्रममा भएको घटनाको जाँचबुझ गर्न गठित उच्च स्तरीय जाँचबुझ आयोगको टोलीले कञ्चनपुरमा आगजनी र तोडफोड भएका घरहरुको अनुगमन गरेको छ । टोलीले बिहीबार सरकारी कार्यालय र निजी घरहरुमा पुगेर अवस्थाबारे जानकारी लिएको हो ।
आयोगका सदस्य विशेश्वर प्रसाद भण्डारीको नेतृत्वको टोलीले कृष्णपुर नगरपालिकासँगै तत्कालीन गृहमन्त्री रमेश लेखक, सुदूरपश्चिमका पूर्वमुख्यमन्त्री राजेन्द्रसिंह रावललगायतको घरमा भएको आगजनी र तोडफोडको अवस्थाबारे प्रत्यक्ष अनुगमन गरेको हो । ‘आगजनी र तोडफोडको अवस्था हेर्दा सबै एउटै प्रकृतिको छ, त्यतिबेलाका भिडियो र फोटोहरु हेर्दा ट्रेण्ड पनि एकनासको छ,’ अनुगमनपछि आयोजित अन्तरक्रियामा बोल्दै आयोगका सदस्य भण्डारीले भने, ‘अहिले हामीहरुले देशभरि प्रतिनिधिमूलक रुपमा अनुगमन गरिरहेका छौं ।’
सदस्य भण्डारीले तोडफोड र आगजनीमा संलग्नलाई कारवाही हुनुपर्ने माग जोडतोडले उठेको बताए । कर्णाली प्रदेश राजधानी सुर्खेतमा अनुगमन सकेर टोली कञ्चनपुर पुगेको हो । शुक्रबार उक्त टोलीले कैलालीमा पनि अनुगमन गर्ने कार्यक्रम तय भएको छ ।
सम्बन्धीत समाचार : सुदूरपश्चिमका पूर्वमुख्यमन्त्रीले गरे जाँचबुझ आयोगका सदस्यमाथि दुर्व्यवहार
