अत्तरिया – सुदूरपश्चिम प्रदेशमा पहिलो कार्यकाल नेकपा माओवादी केन्द्रका त्रिलोचन भट्टले ५ बर्ष चलाए । अन्य प्रदेश सरकार हेरफेर भइरहे पनि सुदूरपश्चिममा भने एकल बहुमत नहुँदा पनि भट्टले पुरै कार्यकाल आफैले सरकार चलाए । यद्दपी नेकपा एमाले र माओवादी एक भएर बनेको नेकपा हुँदा भने भट्टको पार्टी संग बहुँमत थियो । तर, नेकपा धेरै समय टिक्न सकेन् ।
दोस्रो कार्यकालका लागि बैशाख ३० गते निर्वाचन सम्पन्न भयो । दोस्रो पटक भएको निर्वाचनमा कुनै पनि दलले स्पष्ट बहुमत ल्याउन सकेनन् । जसका कारण केन्द्रमा हुने गठबन्धनका आधारमा प्रदेशमा सरकार बनाउनु पर्ने अवस्था सिर्जना भयो । जसअनुसार माओवादी, नागरिक उन्मुक्ति पार्टी, राप्रपाको समर्थनमा एमालेका राजेन्द्र सिह रावल मुख्यमन्त्री बने । पुस २७ गते मुख्यमन्त्री बनेका रावलले संबिधान अनुसार १ महिना भित्र विश्वासको मत लिनुपर्ने थियो । तर, माघ २६ गते १ महिना पुग्दा सम्म रावलले विश्वासको मत लिन सकेनन् । अनी पहिलो पटक सुरु भयो अस्थिर राजनीति ।
त्यसपछि माघ २६ गते नेपालको संविधानको धारा १६८ को उपधारा ३ अनुसार ठूलो दलको हैसियतले नेपाली कांग्रेसका कमल शाह मुख्यमन्त्रीमा नियुक्त भए । उनलाई नेकपा एकीकृत समाजवादीले साथ दिएको थियो । तर, उनीसंंग सरकार चलाउने बहुमत थिएन् ।
मुख्यमन्त्री बन्दा समर्थन गरेको नागरिक उन्मुक्ति पार्टीले पछि विश्वासको मत नदिएर एमालेको सरकार ढलेको थियो । त्यसपछि संबैधानीक व्यवस्थाअनुसार स्वतः मुख्यमन्त्री बनेका शाहले पनि विश्वासको मत पाउने आधार बनेको थिएन् । जसले गर्दा प्रदेश मध्यावधिमा जाने चर्चा पनि चले ।
तर, एकाएक केन्द्रमा सत्ता समिकरण फेरिएपछि मुख्यमन्त्री शाहको भाग्य खुलेजस्तै भयो । केन्द्रकै समिकरण अनुसार प्रदेश चल्नुपर्ने बाध्यताले मुख्यमन्त्रीलाई विश्वासको मत पाउन राहत दियो ।
पहिलो प्रदेश सभामा सबै प्रदेशमा सरकार अस्थिर बनिरहदाँ सुदूरपश्चिममा स्थिर सरकार बनेकोमा दोस्रो प्रदेश सभाबाट अन्य प्रदेशका सबै सरकारले पहिलो पटकमै विश्वासको मत पाउँदा सुदूरपश्चिममा अस्थिरताको विजारोपण भएको थियो । तर, सत्ता समिकरण फेरिपछि प्रदेशमा स्थायित्वको जग बस्ने आशा जागेको छ ।
प्रदेशका तेस्रो मुख्यमन्त्री बनेका शाहले दुई तिहाइ मत पाएका छन । जसका कारण कम्तिमा ढाइ बर्ष यसै सरकारले निरन्तरता पाउने सुनिश्चितता भएको छ । विश्वासको मत लिने समय सकिनु ४ दिन अघि नै विश्वासको मत लिएका शाहले दुइ तिहाइ मत पाएका छन ।
उनलाई कांग्रेस सहित नेकपा माओबादी केन्द्र, नागरिक उन्मुक्ति पार्टी र नेकपा एकीकृत समाजबादीले विश्वासको मत दिएका छन । ५३ प्रदेश सभा सदस्य मध्ये मुख्यमन्त्री शाहले ४१ मत पाएका छन ।
उनको विपक्षमा नेकपा एमालेका १० र राप्रपाका १ प्रदेश सभा सदस्यले मतदान गरेका छन । सभामुख भीमबहादुर भण्डारीले शाहले पेश गरेको प्रस्तावको पक्षमा बहुमत सदस्यले मतदान गरेको भन्दै प्रस्ताव बहुमतले स्वीकृत भएको घोषणा गरेका थिए ।
लामो आरोह अवरोह पछि सुदूरपश्चिममा स्थायी सरकार बनेको छ । स्थायी सरकार बनेपछि लामो समयदेखिको अविश्वास र अस्थिरताको यात्रा रोकिने अपेक्षा गरिएको छ । सरकार स्थिर नहुँदा निर्वाचन भएको १० महिना बितिसक्दा पनि सुदूरपश्चिम सरकारका मन्त्रालयले पुर्णता पाउन सकेका थिएन् । अव प्रदेश सरकारको मन्त्रिमण्डलले पुर्णता पाएर सरकारले गति लिने यस क्षेत्रमा आम नागरिकले अपेक्षा गरेका छन ।
विश्वासको मत प्राप्त गरेपछि मुख्यमन्त्री शाहले संक्षिप्त प्रतिक्रिया दिदै आफू सबैको साझा प्रतिनिधिका रुपमा काम गर्ने प्रतिबद्धता गरेका छन् ।
