काठमाडौं – फिफा विश्वकप २०२६ को तेस्रो स्थानका लागि भएको रोमाञ्चक भिडन्तमा फ्रान्सलाई ६–४ गोलअन्तरले पराजित गर्दै इंग्ल्यान्ड तेस्रो बनेको छ। मियामी स्टेडियममा आइतबार बिहान सम्पन्न प्रतिस्पर्धात्मक खेलमा इंग्ल्यान्डले उत्कृष्ट प्रदर्शन गर्दै पदक सुरक्षित गरेको हो।
इंग्ल्यान्डको जितमा युवा स्टार बुकायो शाका नायक बने। उनले खेलमा ह्याट्रिक पूरा गर्दै फ्रान्सेली रक्षापङ्क्तिलाई दबाबमा राखे। खेलको तेस्रो मिनेटमै राइसले गोल गर्दै इंग्ल्यान्डलाई अग्रता दिलाएका थिए। १८औं मिनेटमा कोन्शाले हेडरमार्फत गोल गर्दै अग्रता दोब्बर पारे।
शाकाले ३७औं मिनेट र पहिलो हाफको इन्जुरी समयमा गोल गरेपछि इंग्ल्यान्ड ४–० को बलियो स्थितिमा पुग्यो। दोस्रो हाफमा फ्रान्सले खेलमा फर्कने प्रयास गरेको थियो। कप्तान किलियन एमबाप्पेले ४८औं र ६६औं मिनेटमा गोल गरे भने ब्राडली बारकोलाले ५४औं मिनेटमा एक गोल थपे। खेल ४–३ को स्थितिमा पुग्दा प्रतिस्पर्धा थप रोचक बनेको थियो।
तर, ८७औं मिनेटमा शाकाले पेनाल्टीमार्फत आफ्नो ह्याट्रिक पूरा गर्दै अग्रता बढाए। खेलको अन्तिम समयमा उस्मान डेम्बेलेले एक गोल थपे पनि जुड बेलिंघमले गोल गर्दै इंग्ल्यान्डलाई ६–४ को शानदार जित दिलाए।
सन् १९६६ मा विश्वकपको उपाधि जितेको इंग्ल्यान्डका लागि यो नतिजा निकै महत्वपूर्ण मानिएको छ। यसअघि सन् २०१८ को विश्वकपमा चौथो स्थानमा चित्त बुझाएको इंग्ल्यान्डले यसपटक भने तेस्रो स्थान हासिल गर्दै आफ्नो विश्वकप यात्रालाई सुखद अन्त्य गरेको छ।
