१८ वर्षको लामो प्रतीक्षापछि पहिलो पटक आईपीएल उपाधि जितेको एक वर्ष मै रोयल च्यालेञ्जर्स बैंग्लुरु (आरसीबी) ले आफ्नो प्रभुत्व कायम राख्दै लगातार दोस्रो पटक ट्रफी उचालेको छ । आइतवार अहमदाबादमा सम्पन्न आईपीएल २०२६ को फाइनलमा आरसीबीले गुजरात टाइटन्सलाई ५ विकेटले पराजित गर्दै उपाधि रक्षा गर्न सफल भयो ।
पहिले ब्याटिङ गरेको गुजरातले निर्धारित २० ओभरमा ८ विकेट गुमाउँदै १५५ रन बनाएको थियो । जवाफमा आरसीबीले १८ ओभरमै ५ विकेट गुमाएर लक्ष्य पूरा गर्यो । आरसीबीको जितमा अनुभवी ब्याट्सम्यान विराट कोहली नायक बने । उनले आईपीएल फाइनलमा आफ्नो सबैभन्दा छिटो अर्धशतक पूरा गर्दै अविजित ७५ रनको उत्कृष्ट इनिङ्स खेले । प्लेअफ इतिहासकै आफ्नो उच्च स्कोर बनाएका कोहलीले टोलीलाई सहज जिततर्फ डोर्याए।
यसअघि टस जितेर फिल्डिङ रोजेको आरसीबीका बलरहरूले प्रारम्भदेखि नै गुजरातमाथि दवाव सिर्जना गरेका थिए । जोस हेजलउडले कप्तान शुभमन गिल ई सस्तैमा आउट गर्दै गुजरातलाई झट्का दिएका थिए । त्यसपछि भुवनेश्वर कुमारले दुई विकेट लिँदा युवा तीव्र गतिका बलर रसिक सलामले ३ विकेट हात पार्दै गुजरातको मध्यक्रम तहसनहस बनाए । सलामले यस सिजन कुल १९ विकेट लिँदै आफ्नो उत्कृष्ट आईपीएल सिजन पूरा गरे ।
अर्कोतर्फ, अनुभवी अलराउन्डर क्रुणाल पाण्ड्याले ४ ओभरमा मात्र २३ रन खर्चेर १ विकेट लिए । उनले महत्वपूर्ण समयमा जोस बटलरलाई आउट गर्दै गुजरातको पुनरागमनको सम्भावना समाप्त पारे । गुजरातका लागि अन्तिमतिर वासिङटन सुन्दरले संघर्षपूर्ण अर्धशतक बनाउँदै ५० रन जोडे पनि टोलीलाई ठूलो स्कोरतर्फ लैजान सकेनन् ।
१५६ रनको लक्ष्य पछ्याएको आरसीबीका लागि वेंकटेश अय्यरले १६ बलमा ३२ रनको आक्रामक सुरुआत दिलाए । त्यसपछि कोहलीले जिम्मेवारीपूर्ण ब्याटिङ गर्दै टोलीलाई जित नजिक पुर्याए । गुजरातका बलर कगिसो रबाडा र रासिद खानले केही विकेट लिएर खेलमा फर्काउने प्रयास गरे पनि कोहलीको उत्कृष्ट प्रदर्शन अगाडि त्यो पर्याप्त भएन ।
खेलको १८औँ ओभरमा कोहलीले लगातार चौका र छक्का प्रहार गर्दै आरसीबीलाई ऐतिहासिक जित दिलाए । यससँगै आरसीबी आईपीएल इतिहासमा लगातार दुई पटक उपाधि जित्ने तेस्रो टोली बनेको छ ।
