कञ्चनपुर– कञ्चनपुरको लालझाँडी गाउँपालिका स्थानीय तहहरूको स्वास्थ्य सूचकाङ्क मूल्याङ्कनको आधारमा कञ्चनपुरमा उत्कृष्ट पालिका घोषणा भएको छ । जिल्ला भित्र रहेका नौ वटा पालिकाको कार्यसम्पादन मूल्याङ्कनको आधारमा लालझाडीलाई उत्कृष्ट पालिका घोषणा गरिएको हो ।
सो सूचकांकमा बेलडाँडी गाउँपालिका दोस्रो र बेदकोट नगरपालिकाले तेस्रो स्थान हासिल गर्न सफल भएका छन् । आर्थिक वर्ष २०८१–०८२ मा सम्पादित स्वास्थ्य कार्यक्रमहरूको जिल्ला स्तरीय वार्षिक समीक्षा गोष्ठीको अवसरमा प्रथम, द्वितीय र तृतीय स्थान हासिल गर्न सफल भएका पालिकाहरूलाई प्रमाण पत्र प्रदान गरिएको छ ।
विभिन्न ३६ सूचकाङ्कको मूल्याङ्कलनका आधारमा लालझाँडी गाउँपालिकाले ९१ अङ्क प्राप्त गरेको थियो । यसैगरी, बेलडाँडी गाउँपालिकाले ८३.५ अङ्क र बेदकोट नगरपालिकाले ८२ अङ्क प्राप्त गरेको स्वास्थ्य कार्यालयका सूचना अधिकारी खगेन्द्र कार्कीले बताए । स्वास्थ्य कार्यालय कञ्चनपुरको आयोजनामा आर्थिक वर्ष २०८१/०८२ मा सम्पादित कार्यक्रमको समीक्षा तथा योजना तर्जुमा कार्यक्रममा उक्त मूल्याङ्कनबाट उत्कृष्ट पालिका घोषणा गरिएको हो ।
प्रथम स्थान हासिल गर्न सफल लालझाडी गाउँपालिकाले आगामी वर्षमा पनि दिगो स्वास्थ्य सेवा प्रदान गर्ने लक्ष्यका साथ अझ प्रभावकारी ढङ्गले कार्य गर्ने प्रतिबद्धता जनाएको छ ।
