डोटी- डोटीमा दुर्घटनामा परी एक युवकको मृत्यु भएपछि परिवारले क्षतिपूर्तिको माग गर्दै केआईसिंह राजमार्ग अवरुद्ध पारेका छन् । मृतकका परिवारले सोमबार साँझबाट सडक अवरुद्ध पारेका हुन् ।
गत शनिबार सुपप्र ०३००१ प ०६६८ नम्बरको मोटरसाइकललाई नम्बर नखुलेको बोलेरो जिपले ठक्कर दिँदा मोटरसाइकलमा सवार दीपायल सिलगढी नगरपालिका-१ सिर्खोलीका ३२ वर्षीय लोकेन्द्र साउँदको मृत्यु थियो भने मोटरसाइकल चालक प्रकेश विक घाइते भएका थिए ।
मृतक तथा घाइतेका परिवारले क्षतिपूर्तिको माग गर्दै केआईसिंह राजमार्गको शिखर नगरपालिका-६ सिर्खोली खण्ड अवरुद्ध गरेका छन् ।
जिल्ला प्रहरी कार्यालयका प्रहरी निरीक्षक सन्दिप शाहले पीडित पक्षसँग सहमतिका लागि वार्ता हुन लागेको बताए । प्रहरीले मोटरसाइकललाई ठक्कर दिएर फरार भएको भन्दै जिप चालक भरत बहादुर सिंहलाई पक्राउ गरेको छ । प्रहरी निरीक्षक शाहले पक्राउ परेका सिंहलाई आज जिल्ला अदालत पेश गर्ने बताए ।
