धनगढी- बझाङको बुङ्गल नगरपालिका–१० टुमेडामा अटो रिक्सा दुर्घटना हुँदा तीन जनाको मृत्यु भएको छ भने एक बालक बेपत्ता भएका छन् ।

आइतबार बिहान करिब १०ः२० बजे टुमेडा गाउँबाट बुङ्गल नगरपालिका–११ हिनगडा बजारतर्फ जाँदै गरेको नम्बर नखुलेको अटो रिक्सा ब्रेक फेल भएर सडकबाट करिब ९०० मिटर तल भीरमा खसेको प्रहरीले जनाएको छ ।

दुर्घटनामा परी बुङ्गल नगरपालिका–१० निवासी ३५/४० वर्षीया राजमती महरा, १५/१६ वर्षीया तारा महरा र ५/६ वर्षीया डल्ली महराको घटनास्थलमै मृत्यु भएको हो । प्रहरीका अनुसार अटोमा चारदेखि पाँच जना सवार रहेको प्रारम्भिक जानकारी प्राप्त भएको छ ।
दुर्घटनापछि एक बालक अझै बेपत्ता रहेका छन् भने घाइतेहरूको उद्धार कार्य भइरहेको छ । बेपत्ता बालकको खोजी तथा उद्धार कार्य जारी रहेको इलाका प्रहरी कार्यालय बुङ्गलका प्रहरी सहायक निरीक्षक वीरबहादुर ठगुन्नाले जानकारी दिएका छन् ।

















