काठमाडौं – नेपाल प्रिमियर लिग (एनपीएल) अन्तर्गत लुम्बिनी लायन्सले जित निकालेको छ । लुम्बिनीले पोखरा एभेन्जर्सलाई ८ विकेटले हराएको हो ।
पोखराले दिएको ९८ रनको लक्ष्य लुम्बिनीले ११.४ ओभरमा २ विकेट गुमाएर ५० बल बाँकी छँदै भेट्टायो ।
कप्तान रोहित पौडेलले अविजित ४७ रनको पारी खेले । यस्तै, निरोशन डिकवेला २७ रनमा नटआउट रहे ।
त्यसअघि टस हारेर ब्याटिङ थालेको पोखराले २० ओभरमा ९ विकेटको क्षतिमा ९७ रन जोड्यो ।
चमिका करुणारत्नेले २५, कुशल भुर्तेलले १४, मेहदी हसनले १३ तथा किरण ठगुन्नाले १२ रन बनाउँदा अन्य ब्याटरले दोहोरो अंकमा रन बनाउन सकेनन् ।
पोखरालाई सस्तैमा समेट्न लुम्बिनीका रुबेन ट्रम्पलमानले तीन तथा तिलक भण्डारीले दुई विकेट लिए भने शेर मल्ल, रोहित पौडेल र अभिशेष गौतमले एक–एक सफलता हात पारे ।
जितसँगै लुम्बिनी तीन खेलमा दुई जित र १ अनिर्णित खेलसहित ५ अंक जोडेर तालिकाको शीर्षस्थानमा उक्लिएको छ ।
अर्कोतर्फ जारी प्रतियोगितामा पोखराको तेस्रो हार हो । तीन खेलमा तीनै हार बेहोरेको पोखरा अंकतालिकाको पुछारमा छ ।
विराटनगरले जनकपुरलाई २ रनले हरायो
यसअघि सम्पन्न खेलमा विराटनगर किंग्सले दोस्रो जित निकालेको छ । विराटनगरले जनकपुर बोल्ट्सलाई २ रनले हराएको हो ।
विराटनगरले दिएको १७४ रनको लक्ष्य पछ्याएको जनकपुरले २० ओभरमा ७ विकेट गुमाएर १७२ रनमात्रै बनायो ।
विराटनगरको जितमा आन्द्रे रसेल नायक बने । आफ्नो इनिङ्समा अर्धशतक हानेका रसेलले जनकपुरको चार विकेट झारे । अन्तिम बलमा विकेट लिएर रसेलले जनकपुरलाई स्तब्ध बनाइदिए ।
जनकपुरका सैफ हसनले ७१ रनको योगदान दिए पनि टोलीको हार टार्न सकेनन् । यस्तै, विशाल सस्लिङले ४३ तथा जिमी निशमले २७ रन जोडे ।
रसेलको चार विकेट बाहेक एन्जेलो म्याथ्युजले दुई तथा रुपेश सिंहले एक विकेट लिए ।
त्यसअघि कीर्तिपुरस्थित त्रिवि मैदानमा टस हारेर ब्याटिङ थालेको विराटनगरले २० ओभरमा ३ विकेटको क्षतिमा १७४ रन जोड्यो ।
विराटनगरका तीन खेलाडीले अर्धशतक प्रहार गरे ।
लोकेश बमले ५० तथा इमरान शेखले ५६ रन बनाउँदा आन्द्रे रसेल ५२ रनमा अविजित रहे ।
बलिङतर्फ जनकपुरका अभिषेक तिवारीले दुई तथा मोइन अलीले एक विकेट लिए ।
जितसँगै विराटनगर अंकतालिकाको शीर्षस्थानमा उक्लिएको छ । चार खेलमा दुई जित र दुई हार बेहोरेको विराटनगरको ४ अंक छ । यता, समान नतिजासहित समान अंक भए पनि जनकपुर रनरेटका आधारमा तेस्रो स्थानमा छ ।
