अत्तरिया – कैलालीको अत्तरियामा युवा फुटबल खेलाडीको क्षमता अभिवृद्धि गर्ने उद्देश्यले एक हप्ते फुटबल क्याम्प सञ्चालन हुने भएको छ । संघर्ष स्पोट्र्स क्लबको आयोजनामा तथा सत्यवती एकेडेमीको सहयोगमा आगामी २०८३ साल कात्तिक १५ गतेदेखि २२ गतेसम्म फुटबल क्याम्प सञ्चालन हुन लागेको हो । गोदावरी नगरपालिका–२, अत्तरियास्थित सत्यवती एकेडेमीको फुटबल मैदानमा सञ्चालन हुने क्याम्प प्रत्येक दिन बिहान ८ बजेदेखि ११ बजेसम्म सञ्चालन हुने आयोजकले जनाएको छ ।
क्याम्पमा सहभागी खेलाडीहरूलाई फुटबलसम्बन्धी प्राविधिक सीप, शारीरिक तन्दुरुस्ती तथा क्षमता विकास, खेल रणनीति, खेल सञ्चालन विधि, सामूहिक भावना, मानसिक सुदृढीकरण र अभ्यास खेललगायतका विषयमा प्रशिक्षण दिइनेछ ।
युवा खेलाडीको प्रतिभा पहिचान गर्दै उनीहरूको खेल कौशल विकास गर्ने, अनुशासित खेलाडी उत्पादन गर्ने तथा फुटबलप्रति आकर्षण बढाउने उद्देश्यले क्याम्प आयोजना गर्न लागिएको संघर्ष स्पोट्र्स क्लबले जनाएको छ ।
‘सानो प्रयास, ठूला खेलाडी’ भन्ने नारासहित सञ्चालन हुन लागेको क्याम्पमा सहभागी हुन इच्छुक युवा फुटबल खेलाडीलाई आयोजकले आग्रह गरेको छ । क्याम्पमा सहभागिता तथा थप जानकारीका लागि सम्पर्क व्यक्ति दिनेश नेपालीलाई ९८२१६८३०२१ नम्बरमा सम्पर्क गर्न सकिनेछ ।
