अत्तरिया – अत्तरिया उद्योग वाणिज्य संघले भोटेकोशी नदीमा आएको बाढीबाट भएको जनधनको क्षतिप्रति गहिरो दुःख व्यक्त गर्दै पीडित परिवार तथा प्रभावित व्यवसायीलाई आवश्यक सहयोग गर्न अपिल गरेको छ ।
संघका महासचिव गम्भीर साउँदद्धारा जारी अपिलमा भदौ १० गते बिहान करिब ९ बजे रसुवा जिल्ला र चीनको सीमाक्षेत्र केरुङतर्फबाट आएको बाढीले भोटेकोशी नदीमा ठूलो धनजनको क्षति भएको उल्लेख गरिएको छ । संघले घटनामा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरेको छ । साथै घाइतेहरूको शीघ्र स्वास्थ्यलाभ तथा बेपत्ता व्यक्तिहरूको सुरक्षित उद्धारको कामना गरेको छ ।
भोटेकोशी नदीमा आएको बाढीका कारण रसुवा लगायत अन्य जिल्लाका उद्योगी, व्यवसायी तथा सर्वसाधारणले ठूलो क्षति व्यहोर्नुपरेको भन्दै संघले विपद्को यस घडीमा प्रभावित नागरिक तथा व्यवसायीको साथमा रहेको जनाएको छ ।
संघले जोखिमयुक्त क्षेत्रका नागरिक तथा व्यवसायीलाई उच्च सतर्कता अपनाउन, नदी तथा खोलाको किनारमा पहिरोको जोखिम भएका स्थान र अन्य जोखिमयुक्त क्षेत्रमा अनावश्यक आवतजावत नगर्न आग्रह गरेको छ । स्थानीय प्रशासन तथा सुरक्षा निकायले जारी गरेका सूचनाको पालना गरी विपद्मा परेका नागरिकको उद्धार, राहत तथा सहयोगका लागि सम्बन्धित निकाय, संघसंस्था, व्यवसायी तथा आम नागरिकलाई आ–आफ्नो स्थानबाट सहयोग र सहकार्यमा जुट्न पनि अपिल गरेको छ ।
त्यस्तै, नेपाल सरकारले राहत कार्यका लागि प्रधानमन्त्री राहत कोष सञ्चालनमा ल्याएको जानकारी गराउँदै उक्त कोषमा समेत आफ्नो क्षेत्रबाट सक्दो सहयोग र सहकार्य गरिदिन अत्तरिया उद्योग वाणिज्य संघले आग्रह गरेको छ ।
