कञ्चनपुर – कञ्चनपुर प्रहरीले भारतबाट अवैध रूपमा भन्सार छली गरी ल्याइएका मल, विषादी तथा बीउबिजनसहितका विभिन्न सामान नियन्त्रणमा लिएको छ।
जिल्लाको भीमदत्त नगरपालिका–४ स्थित गल्ली नम्बर ५ क्षेत्रमा मंगलबार वडा प्रहरी कार्यालय महेन्द्रनगरबाट खटिएको प्रहरी गस्ती टोलीले बेवारिसे अवस्थामा रहेका उक्त सामान फेला पारेको हो।
प्रहरीका अनुसार बरामद गरिएका मल, विषादी, बीउबिजनलगायतका सामानहरूको अनुमानित मूल्य २३ हजार ५ सय रहेको छ। आवश्यक कानुनी प्रक्रिया पूरा गरी उक्त सामान नियन्त्रणमा लिइएको प्रहरीले जनाएको छ।
घटनाका सम्बन्धमा थप अनुसन्धान भइरहेको जिल्ला प्रहरी कार्यालय कञ्चनपुरले जनाएको छ।
