काठमाडाैं – माइतीघरमा आज भएको झडपमा संलग्न एमाले सचिव महेश बस्नेतकी पत्नी अम्बिका सहित १० जनालाई प्रहरीले हिरासतमा राखेको छ । शोभा पाठक नामकी युवतीमाथि आक्रमणको आरोपमा उनीहरूलाई पक्राउ गरिएको थियो ।
माइतीघर मण्डलामा सुधन गुरूङलाई फेरि गृहमन्त्री बनाउन माग गर्दै केही महिला धर्नामा बसेका बेला झडप भएको थियो । झडपमा शोभा पाठक घाइते भएको जनाइएको छ । उनी ट्रमा सेन्टरमा उपचाररत छिन् ।
ट्रमाबाट स्टाटस लेख्दै पाठकले आफूमाथि महेश बस्नेतकी पत्नी र नेकपा एमालेका कार्यकर्ताले आक्रमण गरेको बताएकी छन् ।
उनले लेखेकी छन्, ‘म माइतीघर मण्डलामा बसिरहेको बेला महेश बस्नेतकी स्वास्नी र नेकपा एमालेका कार्यकर्ताले आक्रमण गरेको छ । न्यायप्रेमी पत्रकार र आमाबुवा दाजुभाइ दिदीबहिनीलाई अनुरोध गर्न चाहन्छु। मेरो ज्यान मार्ने आएका त्यो जमातलाई प्रहरी परिसर प्रमुख एमाले निकट भएको कारणले मलाई शङ्का छ।’
प्रहरीले भने पाठक अस्पतालबाट निस्केर जाहेरी दिएपश्चात् १० जनामाथि कारबाही अगाडि बढाइने बतायो । उनीहरूलाई हाल प्रहरी परिसर भद्रकालीमा राखिएको छ ।
