इजरायले अल-मगाजी शरणार्थी शिविरलाई लक्षित गरी हवाई हमला गर्दा कम्तीमा ७० जनाको मृत्यु भएको गाजास्थित हमासको स्वास्थ्य मन्त्रालयले जनाएको छ ।उक्त मन्त्रालयका प्रवक्ताले उक्त क्याम्पमा ठूलो संख्यामा परिवार बसोवास गर्ने भएकाले मृत्यु हुनेको संख्या अझै बढ्न सक्ने बताएका छन् ।
दर्जनौं घाइतेहरूलाई नजिकैको अल-अक्सा अस्पतालमा लगिएको छ । फुटेजमा केही बालबालिकाको अनुहार रगतले छोपिएको र अंगभंग भएको समेत देखिएको छ ।इजरायली सेनाले भने हमासको दाबीका सम्बन्धमा अनुसन्धान भइरहेको बीबीसीसँग बताएको छ ।
उत्तरी गाजा छाड्न इजरायली सेनाले आदेश दिएपछि मध्य गाजामा आएर शरणार्थी शिविरमा बसेकाहरू समेत हवाई हमलाको निसानामा परेको दाबी हमासले गरेको छ ।७ अक्टोबरमा हमासले इजरायली भूमिमा पसेर गरेको आक्रमणपछि भएको प्रतिकारात्मक कारबाहीमा अहिलेसम्म २० हजारभन्दा बढीको मृत्यु भएको स्थानीय अधिकारीलाई उद्धृत गर्दै बीबीसीले उल्लेख गरेको छ ।
