काठमाडौँ । बिहान उठ्ने बित्तिकै केही मान्छे तात्तातो चिया खान मन पराउँछन् । केहीले भने आफ्नो दिनको शुरुआत कागती पानीको साथमा गर्छन् । नियमित रूपमा खाली पेटमा कागती पानी पिउँदा शरीरको तौल कम हुने उनीहरूको धारणा छ ।
यसको साथमा शरीर डिटक्स हुने र पाचन प्रणाली राम्रो हुने पनि विश्वास छ । तर कागती पानी सबैका लागि समान रूपमा लाभदायक हुन सक्दैन भनेर स्वास्थ्य विज्ञहरूले भनेका छन् ।
कागतीमा पर्याप्त मात्रामा साइट्रिक एसिड पाइन्छ । त्यसैले यसको अत्यधिक सेवन वा खाली पेटमा नियमित सेवन गर्दा केही व्यक्तिमा स्वास्थ्यसम्बन्धी समस्या देखिन सक्छ ।
एसिडिटी र छाती पोल्ने समस्या
खाली पेटमा कागती पानी पिउँदा पेटमा अम्लीयपन बढ्न सक्ने भएकाले एसिडिटी, ग्यास तथा छाती पोल्ने समस्या भएका व्यक्तिलाई असहज हुन सक्छ । विशेषगरी एसिड रिफ्लक्स वा जीईआरडीको समस्या भएका व्यक्तिले खाली पेट कागती पानी पिउँदा लक्षण थप बढ्न सक्ने भएकाले सावधानी अपनाउनुपर्छ ।
कमजोर हुन सक्छ दाँतको इनामेल
कागतीमा रहेको एसिडले दाँतको बाहिरी तह अर्थात् इनामेललाई बिस्तारै कमजोर बनाउन सक्छ । नियमित रूपमा अम्लीय पेय पदार्थ सेवन गर्दा दाँत संवेदनशील हुने जोखिम बढ्न सक्छ । त्यसैले कागती पानी पिएपछि साधारण पानीले मुख कुल्ला गर्नु उपयोगी हुन सक्छ । अम्लीय पेय पदार्थ सेवन गरेलगत्तै दाँत माझ्नुको सट्टा केही समय पर्खनु पनि राम्रो मानिन्छ ।
पेट दुख्ने र वाकवाकी लाग्ने
पाचन प्रणाली संवेदनशील भएका केही व्यक्तिलाई कागती पानी सेवन गरेपछि पेट दुख्ने, वाकवाकी लाग्ने वा पेटमा असहजता महसुस हुन सक्छ । यस्तो समस्या बारम्बार देखिएमा कागती पानीको सेवन घटाउनु वा चिकित्सकसँग परामर्श गर्नु उपयुक्त हुन्छ ।
माइग्रेन दुख्ने सम्भावना
अत्यधिक मात्रामा अमिलो फलफूल सेवन गर्दा माइग्रेनको समस्या भएका केही व्यक्तिमा टाउको दुखाइ सुरु हुन सक्ने केही अनुसन्धानले देखाएका छन् । तर यस्तो प्रभाव सबै व्यक्तिमा हुन्छ भन्ने छैन । कागती पानी पिएपछि बारम्बार माइग्रेनको समस्या बढ्ने गरेको अनुभव भएमा यसको सेवनबारे ध्यान दिन आवश्यक हुन्छ ।
यी व्यक्तिले अपनाउनुपर्छ सावधानी
खाली पेटमा कागती पानी सेवन गर्दा केही व्यक्तिले विशेष सावधानी अपनाउनुपर्ने हुन्छ । जुन यस प्रकार रहेका छन :
- एसिडिटी वा जीईआरडी भएका व्यक्ति
- पेटमा अल्सरको समस्या भएका व्यक्ति
- दाँत संवेदनशील भएका व्यक्ति
- बारम्बार माइग्रेन दुख्ने व्यक्ति
पाचन प्रणाली संवेदनशील भएका वा बारम्बार पेट खराब हुने व्यक्ति कागती पानी आफैंमा अस्वस्थ पेय पदार्थ होइन । तर यसलाई सबैले अनिवार्य रूपमा लाभदायक वा तौल घटाउने उपायका रूपमा लिनु उचित हुँदैन । आफ्नो स्वास्थ्य अवस्था र शरीरले देखाउने प्रतिक्रियाअनुसार यसको सेवन गर्नुपर्छ ।
