नवलपरासी– नवलपरासीको रामग्राम नगरपालिकामा एक दिने तरकारी खेती सम्बन्धी तालिम आयोजना गरिएको छ । डिप्रोक्स लघुवित्त वित्तीय संस्था लिमिटेड, शाखा कार्यालय परासीले संस्थाका सदस्यहरूको सीप तथा क्षमता अभिवृद्धि गर्ने उद्देश्यले एक दिने तरकारी खेती तालिम आयोजना गरेको हो ।
आईतबार आयोजित कार्यक्रममा रामग्राम नगरपालिकाकी उपप्रमुख सम्झना चौधरी प्रमुख अतिथि रहेकी थिईन । कार्यक्रममा बोल्दै उनले डिप्रोक्स लघुवित्तले वित्तीय सेवा प्रदान गर्नुका साथै सदस्यहरूको क्षमता विकासका लागि उपयोगी तालिम सञ्चालन गर्दै आएको बताईन । उनले लघुवित्त संस्थाहरूले ग्रामीण क्षेत्रमा वित्तीय पहुँच विस्तार गरी सदस्यहरूको आर्थिक अवस्था सुधार्न महत्वपूर्ण भूमिका खेलेको बताईन । पछिल्लो समय लघुवित्त सम्बन्धमा विभिन्न भ्रम तथा अफवाह फैलाइएका प्रति सचेत रहन सहभागीहरूलाई आग्रह गर्दै उपप्रमुख चौधरीले वास्तविक तथ्य र आवश्यकताका आधारमा मात्र धारणा बनाउन सुझाव दिईन ।
त्यसैगरी, डिप्रोक्स लघुवित्तका शाखा प्रबन्धक खेमराज ओझाले संस्थाका विभिन्न शाखाहरूले देशभर सदस्यहरूको आयआर्जन वृद्धि, उद्यमशीलता विकास तथा सीप अभिवृद्धिका लागि विभिन्न सिपमुलक तालिम सञ्चालन गर्दै आएको बताए । उनले तालिमबाट प्राप्त ज्ञानलाई व्यवहारमा उतारेर आयआर्जन वृद्धि गर्न सहभागी सदस्यहरूलाई आग्रह समेत गरे ।
कार्यक्रममा परासी क्षेत्र अन्तर्गतका विभिन्न केन्द्रमा आबद्ध करिब ४५ जना सदस्यहरूको सहभागिता रहेको थियो । कार्यक्रममा अतिथिका रूपमा डिप्रोक्स लघुवित्त वित्तीय संस्था लिमिटेड, शाखा कार्यालय पकडीका शाखा प्रबन्धक हरेन्द्र प्रसाद यादव तथा निर्धन उत्थान लघुवित्त वित्तीय संस्थाका कर्मचारी लक्ष्मण चौधरीको उपस्थिति रहेको थियो ।
कार्यक्रममा सहभागी सदस्यहरूले तालिमबाट प्राप्त ज्ञान तथा सीपले तरकारी खेतीलाई अझ व्यवस्थित र व्यावसायिक बनाउन सहयोग पुग्ने विश्वास व्यक्त गरेका थिए । तालिमको सहजीकरण रामग्राम नगरपालिकाका कृषि अधिकृत किरण प्रसाद गुप्ता ले गरेका थिए । कार्यक्रममा तरकारी खेतीको व्यावसायिक उत्पादन, रोग तथा कीरा व्यवस्थापन, आधुनिक खेती प्रविधि, मौसमी तरकारी उत्पादन तथा आम्दानी वृद्धि सम्बन्धी विषयमा प्रशिक्षण प्रदान गरिएको थियो ।
केन्द्र नं. १३ की सदस्य सुशीला सिंह क्षेत्री को अध्यक्षतामा आयोजित कार्यक्रमको सञ्चालन डिप्रोक्स लघुवित्तका कर्मचारी सिकेन्द्र प्रसाद चौधरीले गरेका थिए ।
