डोटी – डोटीमा मृत फेला परेकी शिक्षकको सोसाइट नोट फेला परेको छ । । घर नजिकै झुण्डिएको अवस्थामा मृत फेला परेकी शिक्षक पुर्वीचौकी गाउँपालिका– १ की २७ वर्षीया जानकी खड्काको सोसाइट नोट भेटिएको हो ।
आत्महत्या गर्नुअघि लेखेको सुसाइड नोट मृतकको सुत्ने कोठामा मोबाइलको कभर पछाडि फेला परेको प्रहरीले जनाएको छ ।
सुसाइड नोटमा शिक्षा तथा समन्वय एकाइ डोटीमा विद्यालय निरीक्षक (विनि) पदमा कार्यरत २८ वर्षीय गणेश रावलले सामाजिक सञ्जालबाट आफूलाई फ्रेन्ड रिक्वेस्ट पठाएर साथी बनाए विहे गर्न दवाव दिएको उल्लेख छ ।
‘अहिलेसम्म ड्याडी–मम्मीको इज्जत र खुसी सम्झेर बसेकी थिएँ । आज मलाई जिन्दगीले अनौठो मोडमा ल्याएर उभ्याइदियो । सो सरी भाइ मेरो कारण तिमीलाई र ड्याडीलाई यत्रो महिना तनाव भयो,’ सुसाइड नोटमा लेखिएको छ, ‘के गरुँ भाइ, गणेश रावलले आफैं फ्रेन्ड रिक्वेस्ट पठाएको हो । न मैले उसलाई भेटेको छु न देखेको छु । सबै उसका नाटक हुन् मलाई फसाउने ।’
बुवा, आमा र भाइलाई सम्बोधन गर्दै लेखिएको सुसाइड नोटमा उनले रावलसँग फोनमा कुराकानी गर्नु गल्ती भएको, आमाबुवाको इज्जत गुमाएर कसैको श्रीमान् र बुवा भइसकेको मान्छेसँग जीवन जिउन नसकिने उल्लेख गरेकी छिन् ।
‘मेरो आयु यत्ति नै रहेछ, के गरुँ भाइ ? बाबाआमाको इज्जत गुमाएर, तिमीहरूलाई नराम्रो संस्कार सिकाएर कसैको श्रीमान् र बुवा भइसकेको मान्छेसँग जीवन जिउन सक्दिनँ,’ सुसाइट नोटमा लेखिएको छ ।
खड्काले भाइलाई बिरामी अवस्थाका आमाबुवाको ख्याल गर्न र इज्जत गुम्ने कुनै पनि काम नगर्न भनेकी छन् । आफ्नो अफिसर बन्ने सपना अधुरो रहेकाले हार नखाई पूरा गर्न भाइलाई भनेकी छन् । सुसाइड नोटमै खड्काले आफ्नो मोबाइल बैँकिङ तथा अन्य आर्थिक लेनदेनसमेत उल्लेख गरेर परिवारलाई व्यवस्थापन गर्न अनुरोध गरेकी छन् ।
मृतक शिक्षक खड्का बाजुरको बुढीगंगा नगरपालिका– ५ मा रहेको भानोदय माविमा कार्यरत थिइन् ।
सोमबार दिउँसो घरबाट सम्पर्कविहीन भएकी खड्का करिब ७ सय मिटरको दूरीमा झुन्डिएको अवस्थामा मृत फेला परेको प्रहरीले जनाएको छ ।
प्रारम्भिक अनुसन्धानका क्रममा सामाजिक सञ्जाल फेसबुकबाट चिनजान भएर खड्कासँग रावलको प्रेमसम्बन्ध रहेको र उनैले दिएको मानसिक तनावका कारण आत्महत्या गर्न बाध्य पारेको देखिएपछि पक्राउ गरिएको प्रहरीको भनाइ छ ।
जानकीले सुसाइड नोटमा उल्लेख गरेजस्तै रावलले यसअघि नै विवाह गरेका थिए । सन्तानसमेत भइसकेको अवस्थामा श्रीमतीसँग सम्बन्धविच्छेद गरेका उनी जानकीमाथि विवाह गर्न दबाब बढाइरहेका थिए ।
जिल्ला प्रहरी कार्यालयका प्रहरी नायब उपरीक्षक (डीएसपी) दीपेन्द्र पालले रावलले यसअघि नै विवाह गरेको कुरा बुझिएको बताउँदै थप अनुसन्धान जारी रहेको बताए ।
प्रहरीले शिक्षक मृत्यु प्रकरणमा अनुसन्धानका लागि रावललाई पक्राउ गरेको छ । रावलमाथि आत्महत्या दुरुत्सानमा अनुसन्धान भइरहेको प्रहरीले जनाएको छ ।
