संसद् विघटनको मुद्दामा प्रमुख दलहरूले असन्तुष्टि जनाएपछि राष्ट्रपति रामचन्द्र पौडेलले आफ्नो कदमको बचाउ गरेका छन् । राष्ट्रपति पौडेलले पछिल्लो राजनीतिक निर्णयबाट संविधान तथा संसदीय प्रणाली बचेको र संघीय लोकतान्त्रिक गणतन्त्र कायम भएको जिकिर गरेका छन् ।
‘देशको अत्यन्त असहज, विषम र भयपूर्ण परिस्थितिमा कठिन प्रयत्नपश्चात् एउटा शान्तिपूर्ण निकास निस्किएको छ । संविधान बचेको छ, संसदीय प्रणाली बचेको छ र संघीय लोकतान्त्रिक गणतन्त्र कायम रहेको छ । ६ महिनाभित्र प्रतिनिधिसभाको निर्वाचन सम्पन्न गरी अझ उन्नत लोकतन्त्रको बाटोमा अघि बढ्न जनताले अवसर पाएका छन्,’ शीतलनिवासमा सल्लाहकार तथा पदाधिकारीसँग शनिबार छलफलपछि राष्ट्रपतिले जारी गरेको वक्तव्य छ ।
राष्ट्रपति पौडेलले २१ फागुनका लागि तय भएको प्रतिनिधिसभा निर्वाचनमा जान राजनीतिक दलहरूलाई आह्वान गरेका छन् । ‘बडो जुक्तिले प्राप्त अवसरको सदुपयोग गर्दै जनता रिझाउने र आफैँमा सम्हालिँदै आगामी फागुन २१ गते हुने चुनाव सम्पन्न गराउने काममा सहयोग गर्न म सबै पक्षलाई हार्दिक अपिल गर्दछु,’ राष्ट्रपतिले संसद् विघटनको विरोध गरेका दलहरूलाई लक्षित गर्दै शनिबार सन्देश दिएका छन् ।
