डडेल्धुरा – डडेल्धुराको परशुराम नगरपालिकाले प्राविधिक तथा व्यावसायिक शिक्षा अध्ययनका लागि ऋण दिन ३० जना विद्यार्थी छनोट गरेको छ । नगरपालिकाले शैक्षिक प्रमाणपत्र धितो राखेर विना ब्याज ५ लाख ऋण दिने योजना अनुसार विद्यार्थी छनोट गरेको हो । चालु आर्थिक वर्ष २०८१/०८२ का लागि शैक्षिक ऋण दिन नगरपालिकाले ३० लाख रुपैयाँ विनियोजन गरेको छ । परशुराम नगरपालिका क्षेत्रका प्राविधिक तथा व्यावसायिक शिक्षा अध्ययन गर्ने जेहेन्दार तथा विपन्न विद्यार्थीलाई शैक्षिक प्रमाणपत्र धितो राखेर बिना ब्याज शैक्षिक ऋण उपलब्ध गराएर शिक्षामा पहुँच विस्तार गर्न खोजिएको नगर प्रमुख भरत बडायर जोशी बताए ।
उनका अनुसार नगरपालिकाले एसइई वा सो तहभन्दा माथिको प्राविधिक तथा व्यावसायिक शिक्षा अध्ययनका लागि मात्र उक्त कर्जा दिइने छ । एचए, ओभरसियर, स्टाफ नर्सिङ, इन्जिनियरिङ, पाइलटिङ, एमबिबिएस, कृषि, पशु सूचना प्रविधि लगायत अन्य विभिन्न क्षेत्रसँग सम्बन्धित प्राविधिक तथा व्यावसायिक शिक्षा अध्ययन गर्ने विद्यार्थीका लागि शैक्षिक ऋण कार्यक्रम सञ्चालनमा ल्याएको उनले बताए ।
दुई किस्तामा गरेर अधिकतम ५ लाख रुपैयाँसम्म शैक्षिक ऋण प्रदान गरिने नगर प्रमुख जोशीले बताए । नगरपालिकाले प्राविधिक तथा व्यावसायिक शिक्षा अध्ययनका लागि शैक्षिक ऋण दिने सम्बन्धी निर्देशिका २०८१ पनि बनाएको छ ।
उक्त कर्जा रकम शैक्षिक कोर्सको अन्तिम परीक्षा दिएको एक वर्षभित्र २५ प्रतिशत र दुई वर्षभित्र ५० प्रतिशत, तीन वर्षभित्र ७५ प्रतिशत र चार वर्षभित्र सबै कर्जा रकम नगरपालिकालाई फिर्ता दिनुपर्ने छ । नगरपालिकाले उक्त ऋण लिनका लागि कार्तिक १३ गते सूचना जारी गरेको थियो । आवेदन दिएका मध्ये ३० जना विद्यार्थीलाई छनोट गरेर ऋण सम्झौता गर्न नगरपालिको मंगलबार सूचना मार्फत आह्वान गरेको छ ।
