अत्तरिया– कैलालीको अत्तरियामा रहेको सिटी बचत तथा ऋण सहकारी संस्था लिमिटेडले कर्जा लिएर किस्ता तिर्न आलटाल गरेका ऋणीहरुलाई कर्जा चुक्ता गर्न ३५ दिने अल्टिमेटम दिएको छ । सहकारीले शुक्रबार एक सूचना जारी गर्दै कर्जा लिएर साँवा, ब्याज र हर्जाना मासिक वा तोकिएको समयमा नबुझाई कर्जा समेत तिर्न आलटाल गरेका ऋणीहरुलाई ३५ दिनभित्र कर्जा बुझाउन अल्टिमेटम दिएको हो ।
संस्थाले जारी गरेको सूचनामा पटक पटक लिखित तथा मौखिक रुपमा तरताकेदा गर्दा र सम्बन्धित ऋणीको घरमा समेत सम्पर्क गर्दा पनि कर्जा तिर्ने तर्फ चासो नदिएका ऋणीहरुलाई कर्जा चुक्ता गर्न भनिएको छ । त्यसो नभएको खण्डमा सहकारी ऐन, २०७४ को दफा ९२, ९५ र ९६ तथा संस्थाको विनियम र ऋण उपसमितिको कार्यविधि बमोजिम ऋणी तथा जमानीकर्ताको चल–अचल सम्पत्ति, बैंक खाता तथा जग्गा जमिन रोक्का राख्न सम्बन्धित सरकारी निकायमा पठाईने भनिएको छ ।
त्यसबाहेक ऋणी र जमानिकर्तालाई सहकारीको खराब ऋणीको सूचि अर्थात कालोसूचिमा समावेश गरी नाम ठेगाना र तस्बिर समेत सार्वजनिक गरिने सूचनामा उल्लेख गरिएको छ ।
