अत्तरिया – सम्भावित विपद्लाई मध्यनजर गरी गृह मन्त्रालयले यसअघि असोज १९ र २० गते दिएको सार्वजनिक बिदा कटौती गरिएको छ । जिल्ला प्रशासन कार्यालय कैलाली र जिल्ला प्रशासन कार्यालय कञ्चनपुरले सूचना जारी गर्दै असोज २० (सोमबार) को बिदा कटौती गरेका हुन ।
जिल्ला प्रशासन कार्यालय कैलालीका प्रशासकीय अधिकृत शिवराज जोशीद्वारा हस्ताक्षरित सूचनामा गृह मन्त्रालयबाट असोज १९ गते जारी सूचनाका आधारमा सोमबारदेखि जिल्ला स्थित सबै सेवा प्रदायक निकायहरूले सेवा प्रवाह सुचारु गर्नु गराउनु हुन सम्बन्धित सबैलाई निर्देशानुसार अनुरोध गरिएको उल्लेख छ ।
यसैबिच जिल्ला प्रशासन कार्यालय कञ्चनपुरले पनि आज (सोमबार) देखि नै सेवा सुचारु हुने जनाएको छ । प्रशासनले आइतबार एक सूचना जारी गृह मन्त्रालयको असोज १९ र २० गते (आइतबार र सोमबार) नेपाल राज्यभर सार्वजनिक बिदा दिने निर्णय गरेपनि सुदूरपश्चिममा विपद्जन्य प्रभाव कम परेकाले सोमबार देखि सेवा सुचारु हुने जनाएको हो ।
प्रमुख जिल्ला अधिकारी लक्ष्मण ढकालद्वारा जारी सूचनामा सुदूरपश्चिम प्रदेशमा विपद्जन्य घटना तथा मनसुनजन्य प्रभाव कम परेको हुँदा सर्वसाधारण सेवाग्राहीको सुविधालाई मध्यनजर गरी असोज २० गते सोमबार देखि कार्यालयबाट प्रदान गरिने सम्पूर्ण सेवाहरू सुचारु हुने उल्लेख छ ।
सूचनामा जिल्ला स्थित सबै सरकारी कार्यालय, सार्वजनिक संस्थान, बैङ्क तथा वित्तीय संस्थाले समेत आ–आफ्ना कर्मचारीलाई समयमै सूचना प्रवाह गरी सेवा प्रवाह सुचारु गर्नु अनुरोध गरिएको छ ।
