तेहरान – इरानको संयुक्त सैन्य कमाण्डले शनिबारदेखि रणनीतिक रूपमा महत्त्वपूर्ण ‘होर्मुज स्ट्रेट’ पुनः बन्द गर्ने घोषणा गरेको छ । लेबनानमा जारी इजरायली आक्रमण र अमेरिकाले युद्ध अन्त्य गर्ने आफ्नो वाचा पूरा नगरी ‘बदनियतपूर्ण’ रूपमा सम्झौताको उल्लंघन गरेको आरोप लगाउँदै इरानले यस्तो कदम चालेको जनाएको छ । सरकारी टेलिभिजनमार्फत जारी गरिएको सैन्य विज्ञप्तिमा भनिएको छ, ‘यदि आक्रामकता जारी रह्यो भने, हामीले थप कडा कदमहरू चाल्ने योजना बनाएका छौं ।’
इरानको विदेश मन्त्रालयका प्रवक्ता इस्माइल बगाहेईले अमेरिकाले सम्झौताको पूर्ण पालना नगरेसम्म स्थिति सामान्य नहुने संकेत गरेका छन् । उनले भने, ‘अन्तिम सम्झौताका लागि वार्ता तब मात्र अघि बढ्छ जब लेबनानमा जारी लडाइँ रोक्ने लगायतका मुख्य वाचाहरू पूरा गरिन्छ । यदि यी सम्झौताका कुनै पनि हिस्सा लागु गरिएन भने, पूरा सम्झौता नै संकटमा पर्नेछ ।’
यसअघि यसै हप्ताको सुरुमा अमेरिका र इरानबीच एक अन्तरिम सम्झौता भएपछि होर्मुज स्ट्रेटबाट जहाजहरूको आवागमन सुचारु गरिएको थियो । तर, पछिल्लो घटनाक्रमले उक्त सम्झौतालाई जोखिममा पारेको छ ।
लेबनानमा इजरायली हमलाः १६ जनाको मृत्यु
युद्धविरामको चर्चा चलिरहेकै बेला शनिबार दक्षिणी लेबनानमा इजरायलले भीषण हवाई आक्रमण गरेको छ । यी आक्रमणमा दुई बालबालिकासहित कम्तीमा १६ जनाको मृत्यु भएको छ । लगातारको सैन्य कारबाहीले गर्दा मध्यपूर्वमा युद्ध रोक्न भइरहेका कूटनीतिक प्रयासहरूमा धक्का लागेको छ ।
इजरायल र हिजबुल्लाहको आरोप–प्रत्यारोप
इजरायली सेनाका एक अधिकारीका अनुसार हिजबुल्लाहले दक्षिणी लेबनानबाट इजरायली सेनामाथि ५० भन्दा बढी क्षेप्यास्त्र प्रहार गरेपछि जवाफी कारबाही गरिएको हो । इजरायलले हिजबुल्लाहका कमाण्ड सेन्टर र रकेट लन्च गर्ने ठाउँहरूलाई निशाना बनाएको दाबी गरेको छ । वासिङ्टनका लागि इजरायली राजदूत येचिएल लिटरले हिजबुल्लाहले आक्रमण बन्द गरे इजरायल तत्काल युद्धविरामका लागि प्रतिबद्ध रहेको बताएका छन् ।
अर्कोतर्फ, हिजबुल्लाहले आफू युद्धविरामको पालना गर्न तयार रहेको भए पनि इजरायलले बारम्बार उल्लंघन गरेको आरोप लगाएको छ । समूहको सैन्य शाखाले एक विज्ञप्ति जारी गर्दै इजरायली आक्रमणको उचित जवाफ दिने चेतावनी दिएको छ ।
होर्मुज स्ट्रेट बन्द हुँदा विश्वव्यापी तेल आपूर्तिमा ठूलो असर पर्न सक्ने भन्दै अन्तर्राष्ट्रिय समुदायले चिन्ता व्यक्त गरेको छ ।
