अत्तरिया – टिकटक स्टार ह्यारी कार्कीद्वारा अभिनीत ‘मेरा कञ्चनपुर’ बोलको नयाँ देउडा डिजे गीत सार्वजनिक भएको छ । पछिल्लो समय सामाजिक सञ्जाल टिकटकमा डोटेली भाषामा छोटो कमेडी भिडियो बनाएर भाइरल भएका कार्कीले अभिनय गरेको उक्त देउडा डिजे गीत शुक्रवार सार्वजनिक भएको हो ।
उनले आफ्नै युट्युब च्यानलबाट गीत सार्वजनिक गरेका हुन् । कार्कीकै शब्द रहेको गीतमा कुलेन्द्र परियारको लय तथा स्वर रहेको छ । उक्त गीतको भिडियोमा कार्कीसँगै मन्नु भट्ट, विनय चन्दले अभिनय गरेका छन् ।
रमेश बिजुली बिसीको निर्देशन तथा कोरियाग्राफी रहेको भिडियोमा सम्पादन शङ्कर साउँद र छायाङ्कन दया चौधरीले गरेका छन् । कैलाली कञ्चनपुरका रमणीय स्थल महेन्द्रनगर, टिकापुर पार्क, कर्णाली चिसापानी, लगायतका स्थानमा छायाङ्कन गरिएको गीतको भिडियोको दृश्य निर्माण भने जुम प्रोडक्सनले गरेको छ ।
सामाजिक सञ्जालमा कमेडियनका रूपमा परिचित समेत रहेका कार्कीले विभिन्न देउडा गीतमा अभिनय गरेका छन् ।
