बैतडी – खाना पकाउने ग्यास लिक भएर बैतडीको एक पसलमा आगलागी भएको छ ।
जिल्लाको पुर्चौंडी नगरपालिका–७ कुटेबगरमा स्थानीय धौलसिंह ऐरले सञ्चालन गरेको रियान्स किराना पसल तथा होटेलमा शनिबार दिउँसो आगलागी भएको जिल्ला प्रहरी कार्यालय बैतडीका प्रवक्ता, प्रहरी निरीक्षक सुरज सिंहले जानकारी दिए ।
आगलागीबाट पसलभित्र रहेका खुद्रा सामग्री, फ्रिज लगायतका अन्य सामानहरुमा क्षति भएको छ ।
पसलमा आगलागी भएको खबर पाएपछि प्रहरी, सशस्त्र प्रहरी र स्थानीयबासिन्दाको सहयोगमा आगो नियन्त्रणमा लिएको जनाइएको छ । आगलागीबाट मानवीय क्षति नभए पनि अन्य क्षतिको पूर्ण विवरण आउन बाँकी रहेको प्रहरीले जनाएको छ ।
