लम्की – कैलालीको लम्कीचुहा नगरपालिका–३, बल्चौरस्थित मुक्त कमैया सामुदायिक वनबाट अवैध रूपमा कटान गरी लैजाँदै गरिएको १४.३५ क्यूफिट सालको काठसहित एक जना पक्राउ परेका छन्।
शनिबार राति वन क्षेत्रबाट चोरी गरी ल्याइएका ७.७९ र ६.५६ क्यूफिटका दुई गोलिया सालको काठसहित जानकी गाउँपालिका–८, भगरैयाका सर्वन चौधरी पक्राउ परेका हुन्।
काठ ओसारपसारमा प्रयोग गरिएका सु.प.प्र. ०१–००८ प ५६२३ र से.७ प ६४०९ नम्बरका दुई मोटरसाइकलसमेत नियन्त्रणमा लिइएको छ।
मुक्त कमैया सामुदायिक वन उपभोक्ता समूह, स्थानीय युवा क्लब र सब–डिभिजन वन कार्यालय लम्कीको संयुक्त टोलीले राति गस्ती गर्ने क्रममा महेन्द्र राजमार्गको बल्चौर चोक नजिकै २:५५ बजे काठ लोड गरिएका मोटरसाइकलसहित चौधरीलाई नियन्त्रणमा लिएको हो।
घटनामा संलग्न अर्का एक जना भने फरार रहेका छन्। बरामद काठ र मोटरसाइकल सब–डिभिजन वन कार्यालय लम्कीमा बुझाइएको छ।
पक्राउ परेका चौधरीमाथि आवश्यक अनुसन्धान भइरहेको र घटनामा अन्य व्यक्तिको संलग्नताबारे समेत अनुसन्धान जारी रहेको सब–डिभिजन वन कार्यालय लम्कीले जनाएको छ।
