बैतडी – बैतडीमा जिप दुर्घटना हुँदा चालक घाइते भएका छन् । सिगास गाउँपालिका–२ धौलाडीस्थित कच्ची सडकखण्डमा शनिबार दिउँसो साढे १२ बजेतिर सुपप्र ०१–००१ च ४०२८ नम्बरको बोलेरो जिप दुर्घटनामा परेको जिल्ला प्रहरी कार्यालय बैतडीले जनाएको छ ।
सिगासको बल्लेजुडामा यात्रु पुर्याएर गाँजरीतर्फ आइरहेको उक्त जिप उकालो चढ्न नसकी ब्याक हुँदा दुर्घटनामा परेको हो । जिप ब्याक भएपछि चालकले हाम फालेर ज्यान जोगाएका छन् । जिप भने सडकबाट दुई सय मिटर तल खसी पूर्ण रुपमा क्षतिग्रस्त भएको जिल्ला प्रहरी कार्यालय बैतडीका प्रवक्ता, प्रहरी निरीक्षक सुरज सिंहले जानकारी दिए ।
उक्त जिपमा सिगास गाउँपालिका–२ खोल्टेका ३३ बर्षीय चालक गननसिंह धामी मात्रै रहेका र हाम फाल्दा उनी समान्य घाइते भएका छन् । घाइते धामीलाई उपचारका लागि डडेल्धुरा अस्पताल पठाइएको प्रहरीले जनाएको छ ।
