अत्तरिया – कैलालीको शिवकुण्डमा पर्यटकको आकर्षण बढ्दै गएको भएपनि पूर्वाधारको अभाव रहेको छ । गोदावरी नगरपालिका – ९ भल्कामा पर्ने शिवकुण्डमा विकासका न्यूनतम पूर्वाधार पनि छैनन् । माघी र बिदाका दिनहरूमा सयौँको सङ्ख्यामा आन्तरिक पर्यटक भल्का पुग्ने गरेका भएपनि सडक, विजुली, खानेपानी, शौचालय जस्ता आधारभूत विकासका पूर्वाधार नभएको भल्का व्यवस्थापन समितिका अध्यक्ष अजय चौधरीले बताए । उनले बिदाका दिनमा मानिसहर भल्कामा पिकनिक मनाउन आउने गरेका भएपनि शौचालय समेत नहुँदा समस्या हुने गरेको बताए ।
पूर्वपश्चिम राजमार्गको स्याउलेबाट करिब दुई किलोमिटर दक्षिणमा पर्ने शिवकुण्डमा माघी, औंसी, पूर्णिमामा स्नान गरिन्छ भने अन्य दिनहरूमा रमाइलो गर्न, पिकनिक गर्नेको भिड लाग्ने गर्छ । भल्कामा जमिनबाट आफै पानी आउने भएकाले यसमा दैविक शक्ति रहेको मान्यता छ । जमिनबाट आफै पानी आउने भएकाले स्थानीयले यसलाई भल्का भन्ने गरिएको स्थानीय बताउँछन । पानी आउने स्थानमा पानीका फोका (भल्का) आउने भएकाले भल्का नाम राखिएको र पछि सोही स्थानमा शिव मन्दिर निर्माण गरी शिवकुण्ड नाम राखिएको वडा नम्बर ९ का वडाध्यक्ष रामलाल रानाले बताए । उनले हाल मन्दिर सँगै शिवकुण्ड संरक्षणको लागि ढुङ्गाको पर्खाल निर्माण गरिनु बाहेक अन्य पूर्वाधार केही पनि नभएको बताए ।
‘यहाँ पर्यटकको राम्रो सम्भावना भएकाले यसमा अलि ठूलो लगानी गरि पूर्वाधार निर्माण गर्न आवश्यक छ’ उनले भने ‘यो निकै रमणीय ठाउँ भएकाले यहाँ आउने पर्यटकका लागि प्रदेश सरकार र संघीय सरकारले पूर्वाधार निर्माण गरिदिए यो क्षेत्र कैलालीको पर्यटकीय क्षेत्रका रुपमा विकास हुन्छ ।’ उनले भल्कामा पुग्नको लागि बाटोको नै समस्या भएकाले बताए । उनले दशैँ तिहारको समयमा भल्का क्षेत्रमा पिकनिक गर्नेको भिड लाग्ने गरेको बताए ।
भल्का व्यवस्थापन समितिका अध्यक्ष चौधरीले पिकनिक मनाउन आउनेहरुका लागि पानीको पनि समस्या हुने गरेको बताए । उनले मोटर जडान गरेर पानी निकाल्नको लागि विजुली नै नहुँदा समस्या भएको बताए । उनले भल्काको समग्र विकासका लागि डिपिआर बनाएर काम गर्न आवश्यक रहेको बताए । ‘नगरपालिकाले यसको डिपिआर बनाइदिएको भए काम गर्न र बजेट माग गर्न सहज हुने थियो’ उनले भने ‘अहिले समिति मार्फत सामान्य सरसफाइ रंगरोपनका लागि पिकनिक मनाउन आउनेहरुबाट शुल्क लिने गरेका छौ । त्यो रकमबाट सरसफाइ गरिन्छ ।’
पिकनिक बनाउन आउँनेको संख्या धेरै भए पनि आवश्यक पूर्वाधारको अभाव र फोहोर व्यवस्थापनको कमीका कारण सो क्षेत्र दुर्गन्धित बन्दै गइरहेको छ । सो क्षेत्रमा हाल फोहर संकलन गर्ने डस्टबिन सम्म राखिएका छैनन ।
पिकनिकका लागि आउँनेहरूले फाल्ने प्लाष्टिक, मादक पदार्थका बोतल, खसीबोका तथा कुखुराको रौं जथाभावी फल्ने गर्दा सो क्षेत्र दुर्गन्धित बन्न थालेको छ । लक्ष्मी सामुदायिक वनमा पर्ने उक्त क्षेत्रको विकासका लागि सरकारले चासो दिनुपर्ने स्थानीय रामलाल चौधरीले बताए । उनले पछिल्लो समय भल्कामा आउने पर्यटकका कारण स्थानीय धेरैले प्रत्यक्ष अप्रत्यक्ष रुपमा आयआर्जन गर्न पाएकाले यसको विकास गर्न सके स्थानीयलाई पनि फाइदा पुग्ने बताए ।