धनगढी – खप्तड अन्तर्राष्ट्रिय आध्यात्मिक सम्मेलनको तयारी अन्तिम चरणमा पुगेको आयोजकले जानकारी दिएका छन् । सुदूरपश्चिमको प्रमुख पर्यटकीयस्थल खप्तड क्षेत्रमा पहिलो पटक आध्यात्मिक सम्मेलन आयोजना हुन लागेको हो । जेठ २३ देखि २५ गतेसम्म ३ दिन चल्ने सम्मेलनको तयारी अन्तिम चरणमा पुगेको खप्तड क्षेत्र पर्यटन तथा व्यवस्थापन समितिका कार्यकारी निर्देशक भीमबहादुर खड्काले बताए ।
आन्तरिक एवं बाह्य पर्यटकलाई बढवा दिन आयोजना गर्न लागिएको सम्मेलनमा राष्ट्रिय तथा अन्तर्राष्ट्रिय स्तरमा ख्याति प्राप्त व्यक्तिहरुको जमघट हुने बताइएको छ ।
पहिलो दिन सुदूरपश्चिमका मुख्यमन्त्री कमल बहादुर शाहको अध्यक्षतामा हुने सम्मेलनको उद्घाटन प्रधानमन्त्री पुष्पकमल दाहाल प्रचण्डबाट हुने भएको छ । त्यसपछि भारतीय योग गुरु बाबा रामदेवको प्रवचन हुनेछ । उनी काठमाडौँबाट हेलिकप्टरमार्फत् खप्तड पुग्ने कार्यकालिका छ ।
पूर्वप्रधानमन्त्री डा. बाबुराम भट्टराई, माधव कुमार नेपाल, झलनाथ खनाललगायतको पनि विशेष सम्बोधन रहने समितिका निर्देशक खड्का बताउँछन् ।
सम्मेलनको दोस्रो दिन खप्तड धार्मिक पर्यटकीय क्षेत्रको सम्भावना र चुनौती विषयक कार्यपत्र प्रस्तुत हुनेछ । जसमा राजनीतिज्ञ, विषय विज्ञहरुबीच प्यानल डिसकसन हुनेछ । तेस्रो दिन विधिवत् रूपमा सम्मेलन समापन हुनेछ ।
यसैबीच, सम्मेलन अवधिको साँझ–बिहान बाबा रामदेवबाट योग शिविर समेत सञ्चालन हुनेछ । सम्मेलनमा पूर्वप्रधानमन्त्रीहरु, मन्त्री, संघीय सांसद, आध्यात्मिक क्षेत्रका प्रतिष्ठित व्यक्ति, सुदूरपश्चिमका ८८ वटै स्थानीय तहका प्रमुख, सञ्चारकर्मी, पर्यटन व्यवसायीलगायत गरी ५ सय बढीको उपस्थिति रहने जनाइएको छ ।
सम्मेलन सुदूरपश्चिम प्रदेश सरकार, उद्योग, पर्यटन, वन तथा वातावरण मन्त्रालय, नेपाल पर्यटन बोर्ड, खप्तड पर्यटन विकास तथा व्यवस्थापन समिति र स्थानीय तहको संयुक्त आयोजनामा हुन लागेको हो ।
गत वर्ष यहाँ पहिलो पटक योग शिविर सञ्चालन भएको थियो । ‘सुन्दर सुदूरपश्चिम खप्तड योग ध्यान शिविर २०७९’ नामक् तीन दिने शिविर चलेको थियो, जसमा अडाई सयभन्दा बढी योग साधकहरुको सहभागिता थियो ।
सुदूरपश्चिमका पहाडी जिल्ला बाजुरा, बझाङ, डोटी र अछामको केन्द्रमा रहेको खप्तड समुद्री सतहबाट ३२ सय मिटरको उचाइमा छ । खप्तड क्षेत्र प्रकृति, पर्यापर्यटन, आध्यात्मिकलगायत दृष्टिले महत्त्वपूर्ण छ ।
खप्तड क्षेत्रमा खप्तडबाबाले ५० वर्षसम्म साधना गरेका थिए । सो क्षेत्रमा खप्तड बाबाको कुटी, सहस्रलिङ्ग, विभिन्न २२ पाटन, ५३ टापु लगायतका आकर्षक संरचना छन् ।
खप्तड राष्ट्रिय निकुञ्जसमेत रहेको सो क्षेत्र झण्डै २२५ वर्ग किलोमिटरमा फैलिएको छ। खप्तडमा अहिलेसम्म सडक मार्ग भने पुग्न सकेको छैन। डोटीको झिग्रानासम्म यातायातको व्यवस्था भए पनि त्यहाँबाट एक दिनको पैदल यात्रपछि मात्र खप्तड पुगिन्छ ।
सुदूरपश्चिमको प्रमुख पर्यटन गन्तव्यको रूपमा रहेको खप्तडलाई अझै पनि पर्यटनको ‘भर्जिन गन्तव्य’को रूपमा लिइन्छ । यस क्षेत्रलाई भूस्वर्गको उपमाले समेत चित्रित गरिँदै आइएको छ ।
