अत्तरिया – कैलालीको अत्तरियामा आगामी कात्तिक १३ देखि १८ गतेसम्म आयोजना हुने स्वास्थ्य युवा महोत्सव–२०८३ लाई प्रभावकारी बनाउन आयोजकले यहाँ सञ्चालनमा रहेका निजी स्वास्थ्य संस्थाका चिकित्सक, अस्पताल, डेन्टल तथा नाक, कान र घाँटीसम्बन्धी सेवा प्रदायकसँग छलफल गरेको छ।
समृद्ध सुदूरपश्चिम अभियान तथा नेपाल चेम्बर अफ कमर्स सुदूरपश्चिम प्रदेश, जिल्ला र नगर चेम्बर अफ कमर्सको सहकार्यमा आयोजना हुन लागेको महोत्सवलाई स्थानीय स्वास्थ्य संस्थाको सहभागिता र सहकार्यमा सञ्चालन गर्ने उद्देश्यले छलफल गरिएको हो ।
नेपाल चेम्बर अफ कमर्स सुदूरपश्चिम प्रदेशका अध्यक्ष विनोद मल्लले छलफलमा अत्तरियामा सञ्चालनमा रहेका निजी अस्पताल, क्लिनिक, डेन्टल सेवा प्रदायक, नाक–कान–घाँटीसम्बन्धी सेवा प्रदायक तथा अन्य स्वास्थ्य संस्थाको सुझाव मागिएको बताए ।
उनले यस्ता संस्थाको अनुभव र सुझावले महोत्सवको कार्यक्रमलाई स्थानीय आवश्यकताअनुसार व्यवस्थित बनाउन सहयोग पुग्ने अपेक्षा रहेको बताए ।
महोत्सवलाई सफल बनाउन सरकारी तथा निजी स्वास्थ्य संस्था, विशेषज्ञ चिकित्सक, शैक्षिक संस्था, सामाजिक संघसंस्था र निजी क्षेत्रसँग सहकार्य गर्ने आयोजकले जनाएको छ।
