अत्तरिया– अत्तरिया उद्योग वाणिज्य संघको आयोजनामा व्यवसायीहरूका लागि करसम्बन्धी तालिम सम्पन्न भएको छ । आन्तरिक राजस्व कार्यालय कैलालीसँगको सहकार्यमा शनिबार संघको कार्यालयमा तालिम सञ्चालन गरिएको हो ।
गोदावरी नगरपालिकाअन्तर्गत उद्योग तथा व्यवसाय सञ्चालन गर्दै आएका व्यवसायीहरूलाई लक्षित गरी आयोजना गरिएको तालिममा वर्तमान कर नीति, करसम्बन्धी व्यवस्था तथा व्यवसाय सञ्चालनका क्रममा ध्यान दिनुपर्ने विषयमा जानकारी दिइएको थियो ।
तालिममा व्यवसायीहरूले करसम्बन्धी विभिन्न विषयमा जिज्ञासा राखेका थिए । सहभागीका जिज्ञासामाथि आन्तरिक राजस्व कार्यालयका प्रतिनिधिहरूले जानकारी तथा आवश्यक परामर्श प्रदान गरेका थिए ।
अत्तरिया उद्योग वाणिज्य संघका अध्यक्ष कमल कडायतले व्यवसायीहरूलाई करसम्बन्धी जानकारी प्रदान गर्ने उद्देश्यले तालिम आयोजना गरिएको बताए ।
