डोटी – वैदिक सनातन धर्मको संरक्षण, धार्मिक तथा सांस्कृतिक जागरण, सामाजिक समावेशिता र समाजसेवामा पु¥याएको योगदानको कदर गर्दै दिपायल सिलगढी नगरपालिकाले ज्योतिषाचार्य पण्डित गणेश प्रसाद पन्त पञ्चाङ्गकारलाई सम्मान–पत्र प्रदान गरेको छ ।
मंगलबार दिपायल सिलगढी नगरपालिकाल प्रदान गरेको सम्मान–पत्रमा पन्तले दलित समुदायका लागि जन्मदेखि मृत्युसम्म आवश्यक पर्ने वैदिक हिन्दु सनातन धर्मसँग सम्बन्धित धार्मिक, सांस्कृतिक तथा सामाजिक संस्कारहरूको क्षेत्रमा उल्लेखनीय योगदान पु-याएको उल्लेख गरिएको छ । साथै, समतामूलक समाज निर्माण, धार्मिक सहिष्णुता, सामाजिक सद्भाव र सेवाभावका क्षेत्रमा उनले निर्वाह गरेको भूमिकाको उच्च मूल्याङ्कन गर्दै सम्मान गरिएको जनाइएको छ ।
नगर प्रमुख बाजी सिंह खड्का, नगर उपप्रमुख कलावती महर साउँद, प्रमुख प्रशासकीय अधिकृत दामोदर भण्डारी तथा शाखा अधिकृत शंकर सुचिकारको हस्ताक्षर रहेको सम्मान–पत्रमार्फत पन्तको योगदानको प्रशंसा गरिएको छ । सम्मान–पत्रमा उनले आगामी दिनमा पनि सामाजिक समानता, सद्भाव तथा समावेशी समाज निर्माणमा अझ प्रभावकारी भूमिका निर्वाह गर्ने विश्वास व्यक्त गरिएको छ ।
सम्मान ग्रहणपछि ज्यो.पं. गणेश प्रसाद पन्त पञ्चाङ्गकारले दिपायल सिलगढी नगरपालिका परिवार, नगर प्रमुख, जनप्रतिनिधि, कर्मचारी तथा सम्पूर्ण शुभेच्छुकहरूप्रति हार्दिक आभार व्यक्त गरे । उनले प्राप्त सम्मान आफ्नो जीवनको अविस्मरणीय उपलब्धि भएको उल्लेख गर्दै यसले समाज, धर्म, संस्कृति र मानव सेवामा अझ बढी जिम्मेवारीका साथ समर्पित भएर अघि बढ्ने प्रेरणा दिएको बताए । साथै, यो सम्मान आफ्नो मात्र नभई आफूलाई निरन्तर साथ, सहयोग र प्रेरणा प्रदान गर्ने गुरुजन, परिवार, शुभेच्छुक तथा सहयोगी सबैको भएको उल्लेख गरेका छन ।
पन्तले आगामी दिनहरूमा पनि वैदिक संस्कारको संरक्षण, धार्मिक सहिष्णुता, सामाजिक सद्भाव, समावेशी समाज निर्माण तथा मानव सेवामा निरन्तर समर्पित रहने प्रतिबद्धता व्यक्त गरेका छन ।
