काठमाण्डौं – जापानले इतिहासमै पहिलोपटक महिला प्रधानमन्त्री पाएको छ । सानाए ताकाइची जापानको प्रधानमन्त्री बनेकी हुन् । सत्तारूढ लिबरल डेमोक्रेटिम पार्टीको नेता चुनिएकी ताकाइची मंगलबार संसदको तल्लो सदनबाट प्रधानमन्त्रीमा अनुमोदन भएकी हुन् ।
६४ वर्षीया ताकाइचीले संसदको तल्लो सदनका चार सय ६५ सदस्यमध्ये दुई सय ३७ मत प्राप्त गरेको अन्तर्राष्ट्रिय सञ्चारमाध्यमले जनाएका छन् । बहुमतका लागि दुई सय ३३ मत आवश्यक रहेकोमा त्योभन्दा बढी मत पाएपछि उनी प्रधानमन्त्री बन्ने निश्चित भएको हो ।
ताकाइचीले मंगलबार साँझ नै प्रधानमन्त्रीको शपथ ग्रहण गर्ने कार्यक्रम रहेको समाचारमा जनाइएको छ । दुईपटक दलको नेताको निर्वाचन हारेकी ताकाइची गत भदौमा एलडीपीको नेता चयन भएकी थिइन् ।
बेलायतकी पूर्वप्रधानमन्त्री मारग्रेट थ्याचरकी प्रशंसक ताकाइची जापानमा ‘आइरन लेडी’ का रुपमा चर्चित छिन् ।
