अत्तरिया – कैलालीको अत्तरियामा असारे झरी सँगै गरिएको कालोपत्रे उप्किन थालेको छ । अत्तरियाको आदर्श गल्लीमा असारको पहिलो सातादेखि सुरु गरिएको कालोपत्रे निर्माण सम्पन्न नहुँदै उप्किन थालेको हो । कालोपत्रे गर्दा गर्दै पानी परेपछि काम रोक्दै कालोपत्रे गर्दै गरिएको उक्त सडक उप्किन थालेपछि स्थानीयले गुणस्तरहीन काम भएको भन्दै चिन्ता व्यक्त गरेका छन् ।
स्थानीय राम प्रसाद जोशी मोटरसाइकल सडकमा रोकेर राख्दा पनि कालोपत्रे धसिरहेको बताए । उनले कालोपत्रेको काम गुणस्तरहीन भएको बताए । ‘२ वर्ष अघि देखि निर्माण गरिएको सडक अहिले असारमा आएर कालोपत्रे गर्दा यस्तो अवस्था भयो’ उनले भने ‘पहिले नै पिच थियो । कुनै कुनै ठाउँमा मात्रै फुटेको थियो । पिच फुटाएर एक डेढ वर्ष अलपत्र छोडेर धुलो खुवाए । अहिले पिच गरे भनेर खुसी भएका थियौ यस्तो भयो । पिच गुणस्तरहीन भयो ।’ उनले पानी परिरहेकै बेला भिजेकै सडकमा कालोपत्रे गरिएकाले यस्तो भएको हुन सक्ने बताए । उनले कालोपत्रेको गुणस्तर जाँच गरिनुपर्ने बताए ।
स्थानीय पूर्ण प्रसाद चौलागाईले सडकको अवस्था हेर्दा टिकाउ नहुने जस्तो देखिएको भन्दै चिन्ता व्यक्त गरे । ‘लामो समय देखि धुलो खाइरहेका थियौ । अहिले पिच भएपछि खुसी लागेको थियो । अहिले जहाँ निर गाडी राख्यो त्यही निर धसिरहेको छ’ उनले भने ‘यो टिकाउ हुँदैन कि भन्ने लागेर यसको मापदण्ड के हो सम्बन्धित निकायले हेरिदिनु प¥यो भन्ने हाम्रो माग हो ।’
उनले बाइक राख्दा पनि धस्ने सडक बनाउनुको अर्थ नभएको बताए । ‘बाइकको ब्रेक हान्न नमिल्ने, बाइक चलाउन नमिल्ने, बाइक रोक्दा स्ट्यान्डले खाल्डो पर्ने भइरहेको छ’ उनले भने ‘यस्तो रोड बन्नुको के अर्थ । यस्तो अवस्था भएपछि हामीले नबोले को ले बोल्ने अहिले नबोले कहिले बोल्ने ?’
स्थानीय दीपक न्यौपानेले सडक गत वर्ष नै बन्नुपर्ने भए पनि ढिला गरी असारमा काम गरिएको बताए । उनले ठुला सवारी साधन चलाए पिच छिटै बिग्रन सक्ने बताए । ‘यो पनि काम न काजको पिच भयो । यसलाई पिच सडक नै भन्न मिल्ने अवस्था छैन’ उनले भने ‘ठुलो गाडी आयो भने यो पिच एकै दिनमा जाला जस्तो छ ।’
स्थानीय दुर्गा पोखरेले कालोपत्रे गर्दा गर्दै पनि आवाज उठाएको भए पनि बेवास्ता गरिएको बताए । ‘यो सडक पिच हुँदै गर्दा पनि आवाज उठाउँदा साखै वास्ता गरिएन’ उनले भने ‘यो सडक मापदण्ड विपरीत गुणस्तरहीन भएको देखिएको छ । यो राज्यको ढुकुटी रित्याउने काम हो । यसको अनुगमन गरेर त्रुटि भएमा यसलाई सच्याउनु पर्छ ।’
गोदावरी नगरपालिकाले आर्थिक वर्ष २०८०/०८१ मै ठेक्का लगाएको करिब २२५ मिटरको यो सडक निर्माणको जिम्मा कुमार शिशिर कन्स्ट्रक्सनलाई दिइएको थियो । नगरपालिकाले आदर्श गल्ली सहित नगरभित्रका ३६ वटा सडक कालोपत्रे गर्नको लागि एकमुष्ट ठेक्का आह्वान गरेको थियो । ३६ वटा सडकलाई ५ प्याकेजमा छुट्टाएर टेन्डर आह्वान गर्दा ३ वटा निर्माण कम्पनीले सडक कालोपत्रेको जिम्मा पाएका थिए । ५ प्याकेज मध्ये पहिलो, दोस्रो र चौथो खण्डका सडकको निर्माणको जिम्मा कुमार शिशिर कन्स्ट्रक्सनले पाएको थियो ।
जसमा वडा नम्बर १ का १३ सडक, दोस्रो प्याकेज अन्तरगत वडा नम्बर २, ३ र ४ का ७ वटा सडक र चौथो प्याकेज अन्तरगत वडा नम्बर १०, ११ र १२ का सडक कालोपत्रेका लागि ठेक्का सम्झौता गरिएको थियो भने पहिलो प्याकेजको १ किलोमिटर ७०९ मिटर कालोपत्रे गर्न १ करोड ११ लाख ८७ हजार ७८८, दोस्रो प्याकेजको २ किलोमिटर १० मिटर कालोपत्रे गर्न १ करोड १५ लाख ८३ हजार ९७६ र चौथो प्याकेजको १ किलोमिटर ४५७ मिटर सडक कालोपत्रे गर्न ९२ लाख ३८ हजार २७० रुपैयाँमा ठेक्का सम्झौता भएको थियो ।
भिडियो
