बैतडी – बैतडीमा फागुन २१ गते हुने प्रतिनिधिसभा निर्वाचनका लागि ५ वटा मतदान केन्द्र थपिएका छन् । गएको निर्वाचनमा २ सय १० मतदान केन्द्र रहेको बैतडीमा आगामी निर्वाचनका लागि २ सय १४ मतदान केन्द्र कायम भएको जिल्ला निर्वाचन कार्यालय बैतडीका सूचना अधिकारी नरेश दयालले बताए । मतदानस्थल भने साविककै १ सय २९ वटा कायम रहेका उनले बताए ।
थप भएका निर्वाचन केन्द्रमा सिगास गाउँपालिका–४ को वडा कार्यालय भवन कान्धार, दशरथचन्द नगरपालिका–७ केदारशीला आधारभूत विद्यालय सुर्काल, दशरथचन्द–९ केदार आधारभूत विद्यालय सिम लोडासौं, शिवनाथ गाउँपालिका–३ श्रीपूर आधारभूत विद्यालय बछला र पाटन नगरपालिका–५ त्रिपुरेश्वर मावि कुलडा रहेका छन् । यस्तै मेलौली नगरपालिका–२ कोटेश्वर आधारभूत विद्यालयमा रहेका दुई मतदान केन्द्रमध्ये एउटा हटाइएको छ । जिल्ला सदरमुकाममा एउटा अस्थायी मतदान केन्द्र रहने छ ।
स्थानीय, प्रदेश र संघ मातहत रहेका कर्मचारी, सुरक्षा निकायका प्रतिनिधि, कारागारमा रहेका वा बृद्धाआश्रममा रहेका अस्थायी मतदाताको विवरण संकलनको काम भइरहेको निर्वाचन कार्यालयले जनाएको छ ।
जिल्लामा आगामी निर्वाचनका लागि १ लाख ५६ हजार ३ सय ७२ मतदाता रहेका छन्। यो वर्ष ६ हजार २ सय १६ मतदाता थपिएका छन् ।
