रमेश बहादुर सिँह/बझाङ – बझाङमा दुग्ध संकलन केन्द्र भवनको उद्घाटन गरिएको छ । जिल्लाको छविसपाथिभेरा गाँउपालिका – १ बगडगाँउमा एक कार्यक्रमका बीच जिल्ला समन्वय समितिका अध्यक्ष नरबहादुर बोहराले भवनको उद्घाटन गरेका हुन ।
सुदूरपश्चिम प्रदेश भुमि व्यवस्था, कृषि तथा सहकारी मन्त्रालय पशुपंक्षी तथा मत्स्य विकास निर्देशनालयको ७ लाख ४० हजार र भेटेनरी अस्पताल तथा पशुपन्छी विज्ञ केन्द्र बझाङको ६ लाख २९ हजार गरी जम्मा १३ लाख ६९ हजारको लागतमा मटेला उन्नत गाईपालन समन्वय समितीले भवनको निर्माण गरेको हो ।
उद्घाटन कार्यक्रममा वोल्दै भेटेनरी अस्पताल तथा पशुपंछी विज्ञ केन्द्र बझाङका कार्यालय प्रमुख डाक्टर विनोदकुमार कठायतले प्रदेश सरकारले कृषकहरुको जिवन स्तरमा सुधार ल्याउन विभिन्न खाले कार्यक्रमहरु सञ्चालन गर्दै आएको बताए ।
उनले कृषकहरुले पनि अनुदानमा पाएका विभिन्न कार्यक्रमहरुलाई आफ्ना छोराछोरी सरह मान्नुपर्ने र त्यसवाट उत्पादन भएको बस्तुहरुको बजारीकरण गरी बेच्नुपर्ने बताए ।
आफ्नो कार्यालयबाट पनि कृषि सम्बन्धी निरन्तर कार्यक्रम गर्दै आएको र आगामी दिनहरुमा पनि गर्दै जाने उनले बताए । उनले सडक सञ्जालसँग जोडिएको क्षेत्र भएकाले यहाँका केही ठाउँलाई दुग्घजन्य पदार्थको पकेट क्षेत्र बनाउनुपर्ने बताए ।
त्यस्तै उक्त कार्यक्रममा बोल्दै मटेला उन्नत गाईपालन समन्वय समितीका अध्यक्ष रामभक्त गिरीले कृषकहरुले उत्पादन गरेको दूधलाई अँझै गुणस्तरीय बनाउनको लागी धेरै मेहनत गर्नुपर्ने बताए ।
सरकारलाई ढाँटे आफु पनी ठगिने हुँदा सरकारले दिएको अनुदानको भरपुर उपयोग गरेर जिविकोपार्जन गर्नुपर्ने र आगामी दिनहरुमा पनी गाईपालन व्यवसायलाई अगाडी बढाउनु पर्ने उनले बताए ।
उद्घाटन कार्यक्रममा प्रमुख जिल्ला अधिकारी अर्यालका साथै जिल्ला प्रहरी कार्यालय बझाङका निमित्त प्रहरी प्रमुख प्रहरी निरिक्षक जनक ढुङ्गाना, सशस्त्र प्रहरी नायव उपरिक्षक दामोदर भण्डारी लगायतको उपस्थिति रहेको थियो ।
