बझाङ – सत्तारुढ दलबीच स्थानीय तहको निर्वाचनमा गठबन्धन गर्ने गरी भएको निर्णय बझाङ जिल्लामा कार्यान्वयन नहुने अवस्था देखिएको छ । गठबन्धन दलहरुबीच सिट बाँडफाँडमा कुरा नमिलेपछि गठबन्धनको सम्भावना कम हुँदै गएको नेताहरुले बताउँन थालेका छन् ।
यसैबीच नेकपा माओवादी केन्द्रले बुङगल नगरपालिका र दुर्गाथली गाउँपालिकामा एकल उम्मेदवारी घोषणा गरेको छ । केन्द्रले बुङगल नगरपालिकाको प्रमुखमा हरिबहादुर कुँवर र उपप्रमुखमा छायाँ सिंहलाई उठाउने निर्णय गरेको माओवादी केन्द्रका बुङगल नगरपालिका इन्चार्ज अस्मित सिंहले जानकारी दिए । कुँवर २०७४ सालको निर्वाचनमा पनि नगरप्रमुखको लागि चुनाव लडेका थिए भने सिंह पूर्व माओवादी लडाकु हुन् ।
यस्तै माओवादी केन्द्रले दुर्गाथली गाउँपालिकाको अध्यक्षमा पनि दिलबहादुर थापालाई उठाउने पक्का भएको नेकपा माओवादी केन्द्रका सुदुरपश्चिम प्रदेश सचिवसमेत रहेका संविधान सभा सदस्य जनकबहादुर बुढाले बताए । थापा यसअघिको निर्वाचनमा नेकपा एमाले सँग पराजित भएका थिए । उनी पूर्व लडाकु कमान्डर पनि हुन् ।
‘गठबन्धन भंगै भइसक्यो भनेर घोषणा त भइसकेको छैन,’ उनले भने, ‘तर गठबन्धनको सम्भावना अब कोमामा गइसक्यो । अरु पालिकामा पनि एक्लै निर्वाचन लड्ने गरी उम्मेदवार छनोटमा लागि सकेका छौ,’ उनले माओवादीको जनाधार बलियो भएका ठाउँमा समाजवादीले दाबी गरेको र गठबन्धन संयन्त्रको नेतृत्व गरेको कांग्रेसले ठोस पहल नगरेका कारण गठबन्धन नहुने सम्भावना बलियो बन्दै गएको बताए ।
सत्ता गठबन्धनको अर्काे घटक नेकपा एसले पनि एकल उम्मेदवार छनोटको लागि गृहकार्य थालेको छ । उम्मेदवार छनोट भइसके पछि पनि गठबन्धनको प्रयास भने जारी रहने एसका प्रदेश कमिटी सदस्य कलक धामीले बताए । ‘हामीले उम्मेदवार छनोट गरिसके पछि पनि गठबन्धनको प्रयास त जारी नै रहन्छ । अहिले नै गठबन्धनको सम्भावना सकियो भनेर भन्नु हतार हुनेछ’ उनले भने ।
माओवादी र समाजवादीले छविस पाथीभेरा गाउँपालिका नछोड्ने बताएपछि गठबन्धनमा सकस देखिएको नेताहरुले बताएका छन । यस गाउँपालिकामा एमालेको तर्फबाट निर्वाचित अध्यक्ष अक्कल बहादुर धामी र उपाध्यक्ष राधिका रताला अहिले नेकपा एसमा खुलेका छन् । धामी प्रदेश कमिटी सदस्य र रताला एसको जिल्ला सचिवालय सदस्य रहेका छन् । यद्यपि माओवादी केन्द्रले छविसमा आफ्नो जनाधार बलियो रहेको र धामी र रतालाले निर्वाचन आयोगमा नेकपा एसमा सनाखत नगरेको कारण देखाउदै उक्त पालिका आफुले पाउनु पर्ने अडान राखेको छ ।
यता नेपाली काङ्ग्रेसले पनि गठबन्धनको सम्भावना कम रहेको बताएको छ । ‘गठबन्धन हुने नहुने सम्भावना आधा आधा छ’ नेपाली काङ्ग्रेसका जिल्ला सचिव उत्तम रोकायाले भने, ‘गठबन्धनको लागि हामी निरन्तर छलफलमै छौं तर हाम्रै पार्टीभित्रका आकांक्षीहरु मिलाउन पनि सकस भइरहेको छ ।’ उनले सकेसम्म गठबन्धन गर्ने र नमिले एक्लाएक्लै निर्वाचनमा जाने गरी उम्मेदवार छनोटको प्रक्रिया अगाडि बढेको बताए ।
