बैतडी– यही भदौ २४ गतेको जेनजी आन्दोलनका क्रममा ज्यान गुमाएका बैतडीका २० वर्षिय दीपक साउँदको घरमा प्रमुख जिल्ला अधिकारी पुण्यविक्रम पौडेल सहितको टोली पुगेको छ । जिल्लाको शिवनाथ गाउँपालिका– २ का साउँदको परिवारको अवस्था बुझ्न टोली उनको घरमै पुगेको हो ।
साउँदको घरमा गएर पारिवारिक अवस्थाबारे जानकारी लिइएको प्रजिअ पौडेलले बताए । ‘सहिद परिवारको अवस्थाबारे जानकारी लिन उहाँको घरमा पुगेका हौंँ । दीपकप्रति श्रद्धाञ्जली र परिवारमा समवेदना प्रकट गरेका छौंँ’ उनले भने ‘परिवारलाई राज्यका तर्फबाट भेटवार्ता र सरकारको भएको महसुस गराउन र सान्त्वना दिन हामी प्रयासरत छौँ ।’
दीपकको परिवारलाई यसअघि सरकारको तर्फबाट १५ लाख र शिवनाथ गाउँपालिकाले एक लाख सहयोग गरेको थियो । परिवारसँगको भेटका क्रममा परिवारका कुनै सदस्यलाई रोजगारीको व्यवस्था गर्न सकिने विषयमा पनि छलफल भएको प्रजिअ पौडेलले जानकारी दिए । उनले चौधरी ग्रुपले रोजगारी दिने जानकारी दिएपछि प्रक्रिया अघि बढाइएको बताए ।
