धनगढी – सुदूरपश्चिम प्रज्ञा –प्रतिष्ठानका उपकुलपति डा. टीएन जोशीले व्यक्तित्व विकासका लागि उद्घोषण कला आवश्यक रहेको बताएका छन् । मंगलबार स्वतन्त्र विद्यार्थी युनियन कैलाली बहुमुखी क्याम्पसले सञ्चालन गरेको पाँच दिने रेडियो तथा मञ्च उद्घोषण तालिमको समापन कार्यक्रममा बोल्दै जोशीले सो कुरा बताएका हुन ।
समारोहमा प्रमुख अतिथि रहेका उनले वर्तमान समयमा उद्घोषण कला सबैको लागि अपरिहार्य भएको बताए । उनले आगामी दिनमा उद्घोषण कलाका साथै सुदूरपश्चिमको भाषा ,कला साहित्य र संस्कृतिको विकासका लागि प्रज्ञा प्रतिष्ठान योजनाबद्ध रूपमा अगाडि बढ्ने बताए । उनले तालिममा सिकेका कुरा व्यवहारमा उतार्न पनि विद्यार्थीहरूलाई आग्रह गरे ।
स्ववियु सभापति यमराज जोशीको सभापतित्वमा सम्पन्न समारोहमा विशिष्ट अतिथि क्याम्पस प्रमुख तोयराज भट्ट, प्राध्यापक संघका सभापति डा. शिव सापकोटा, सह प्रा.मानबहादुर जोरा,प्रशिक्षक टेकेन्द्र देउवा लगायतले शुभकामना व्यक्त गरेका थिए । तालिममा ६० प्रशिक्षार्थीको सहभागिता रहेको कार्यक्रम संयोजक गौरी सिंहले बताइन ।
